မြင်းမူမြို့နယ်တွင် စစ်​ကောင်စီတပ်ယာဥ်တန်း မိုင်းဆွဲခံရ ကားနှစ်စီးထိမှန်ပျက်စီး

စစ်ကိုင်းတိုင်း မြင်းမူမြို့နယ် မန္တလေး-မုံရွာလမ်းပေါ်တွင် ယနေ့နေ့လယ်ပိုင်းက အကြမ်းဖက်စစ်ကောင်စီတပ်ကားတန်းမိုင်းခွဲခံရပြီး ကားနှစ်စီးထိမှန်ခဲ့ရာ ကျဆုံးထိခိုက်မှုရှိနိုင်ကြောင်း ညီနောင်မဟာမိတ်ငါးဖွဲ့က သတင်းထုတ်ပြန်သည်။

ယနေ့(ဒီဇင်ဘာလ ၁၂ရက်)မွန်းလွဲ ၁၂နာရီခွဲခန့်က မန္တလေး-မုံရွာလမ်းမပေါ် မြင်းမူမြို့နယ် ဘိုးမင်းကြီးကင်း ကျေးရွာနှင့် ဂွေးပင်တောကျေးရွာအကြားတွင် စစ်ကိုင်းမှမုံရွာသို့သွားသည့် စစ်ကား ၂၇ စီးအား မိုင်းပဒေသာ ၄လုံးနှင့် တစ်ဖက်ပွင့်ပြောင်း ၂လုံးတို့ဖြင့် ဖောက်ခွဲတိုက်ခိုက်ရာ ကားနှစ်စီးထိမှန်ခဲ့ကြောင်း၊ ကျဆုံးထိခိုက်အရေအတွက်အတိအကျမသိရသေးကြောင်း ညီနောင်မဟာမိတ်ငါးဖွဲ့က အသိပေးသည်။

အကြမ်းဖက်စစ်ကောင်စီတပ်ဘက်မှ လိုက်လံပစ်ခတ်ခဲ့သော်လည်း ပြည်သူ့ရဲဘော်များ အထိအခိုက်အကျ အဆုံးမရှိ ပြန်လည်ဆုတ်ခွာနိုင်ခဲ့ကြောင်းလည်း​ဖော်ပြထားသည်။

အဆိုပါတိုက်ခိုက်မှုအား Black Eagle Denfence Force-MMU၊ အဖွဲ့ဦးဆောင်ပြီး Myin Myu Defence Force-MMDF၊ မြင်းမူလျှပ်စီးပြောက်ကျားအဖွဲ့၊ People Denfence Force Myin Myu-MMUPDF၊ မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့ CDSOM စသည့်ညီနောင်မဟာမိတ် ၅ ဖွဲ့မှ ပူးပေါင်းဆောင်ရွက်ခဲ့ခြင်းဖြစ်ကြောင်း ၎င်းတို့က ပြောသည်။

Public Service Announcement

ဒီဇင်ဘာ၁၀ရက် ညနေ ၃နာရီ ၃၀မိနစ် အချိန်ကလည်း မန္တလေး-မုံရွာလမ်းပေါ် စစ်ကိုင်းမြို့နယ် ညောင်ပင်ဝန်းကျေးရွာ နှင့် နတ်ခရိုင်ကျေးရွာကြားတွင် အကြမ်းဖက် စစ်ကောင်စီ၏ ထောက်ပို့ယာဉ် မိုးကာအုပ် တွဲကားအနက်ရောင်အား ရှေ့ထွက်မိုင်းဖြင့် တိုက်ခိုက်ခံခဲ့ရသေးသည်။