သထုံမြို့နယ်ရှိ စစ်ကောင်စီတပ်စခန်း လက်နက်ကြီးပစ်ခတ်ခံရ၍ ဗိုလ်တစ်ဦးဒဏ်ရာရ

မွန်ပြည်နယ် သထုံမြို့နယ်ရှိ စစ်ကောင်စီ၏တပ်စခန်းတစ်ခု လက်နက်ကြီးဖြင့် ပစ်ခတ်ခံရ၍ ဗိုလ်တစ်ဦး ဒဏ်ရာရရှိခဲ့ကြောင်း ကရင်အမျိုးသားအစည်းအရုံး (KNU) တပ်မဟာ(၁) တာဝန်ရှိသူတစ်ဦးက ပြောသည်။

ဒီဇင်ဘာ ၁၃ရက် ညပိုင်းက စစ်ကောင်စီတပ်၏ ဝီရော်စခန်းကို လက်နက်ကြီး ပစ်ခတ်ခံရခြင်းဖြစ်သည်ဟု ဆိုသည်။

“ဖြစ်စဉ်ကတော့ အဲဒီ ဝီရော်စခန်းကို လက်နက်ကြီးနဲ့ လှမ်းပစ်တာ။ လှမ်းပစ်တော့ စခန်းအတွင်းကျပြီးပေါက်ကွဲတယ်။ ဗိုလ်တစ်ယောက် ဒဏ်ရာရရှိတယ်” ဟု တပ်မဟာ(၁) တာဝန်ရှိသူက ပြောသည်။

စစ်ကောင်စီတပ်မှ သုံးဦးသေ၊ ငါးဦးဒဏ်ရာရသည်ဟု သတင်းဖော်ပြမှု ရှိသော်လည်း မြေပြင်သို့ ဆက်သွယ်ကြည့်ရာ စစ်ဗိုလ်တစ်ဦးသာ ဒဏ်ရာရသည်ဟု ပြောကြားကြောင်း ၎င်းက ဆိုသည်။

Public Service Announcement

အဆိုပါ တိုက်ခိုက်မှုကို ဒေသခံ ပြည်သူ့ကာကွယ်ရေးတပ်ဖွဲ့နှင့် KNLA တပ်မဟာ(၁)၊ တပ်ရင်း(၂) တပ်ဖွဲ့ဝင်များ ပူးပေါင်း ဆောင်ရွက်သည်ဟု ဖော်ပြနေသော်လည်း အောက်ခြေတပ်ဖွဲ့များနှင့် ဆက်သွယ်မှုမရသေး၍ မသိရသေးဟု တပ်မဟာ(၁)တာဝန်ရှိသူက ပြောသည်။