ဖေဖော်ဝါရီ အာဏာသိမ်းမှုအပေါ် လက်နက်ကိုင်ခုခံခြင်းကို ဖိနှိပ်သည့် အစိတ်အပိုင်းအဖြစ် မြန်မာစစ်တပ်သည် အရပ်သားပြည်သူများ အရေးတကြီးလိုအပ်နေသော အကူအညီနှင့် ဆေးဝါးထောက်ပံ့မှုများကို နှောင့်ယှက်တားမြစ်နေကြောင်း အပြည်ပြည်ဆိုင်ရာလွတ်ငြိမ်း ချမ်းသာခွင့်အဖွဲ့(Amnesty International)က ယနေ့ (ဒီဇင်ဘာ ၁၇ ရက်)ထုတ်ပြန်သည်။
လက်နက်ကိုင်ခုခံရေးသမားများအပေါ် လူမဆန်သော စစ်ပွဲ၏ အစိတ်အပိုင်းအဖြစ် မြန်မာစစ်တပ်သည် အဆင်ခြင်းမဲ့လေကြောင်းတိုက်ခိုက်မှုများနှင့် လူနေအိမ်ရာနှင့်ချီ မီးရှို့ဖျက်ဆီးမှုများသာမက အရေးပေါ် အကူအညီများ ဖြတ်တောက်ခြင်းနှင့် နိုင်ငံတဝန်း လူသားချင်းစာနာမှုပေးသူဝန်ထမ်းများကို ထိန်းသိမ်းခြင်းတို့ကို လုပ်ဆောင်နေကြောင်း Amnesty International က ထုတ်ပြန်သည်။
“မြန်မာစစ်တပ်က သူ့ပြည်သူတွေကို လူမဆန်တဲ့လုပ်ရပ်တွေ ဆက်လက်လုပ်ဆောင်နေမယ်ဆိုရင် အသက်ဆုံးရှုံးမှုတွေကို ကျွန်မတို့ ပိုမိုမြင်တွေ့ရပါလိမ့်မယ်”ဟု Amnesty International အရှေ့တောင်အာရှဒုတိယညွန်ကြားရေးမှူး Emerlynne Gil က ပြောသည်။
နေရပ်စွန့်ခွာသူ အရပ်သားများ၊ ပြည်တွင်းအကူအညီပေးသူဝန်ထမ်းများနှင့် စေတနာ့ဝန်ထမ်း များကို Amnesty က တွေ့ဆုံမေးမြန်းခဲ့ပြီး အားကောင်းသောမျက်မြင်သက်သေများစုစည်းခဲ့ ခြင်းက ပြည်သူများ ငတ်မွတ်ရန်နှင့် ကျန်းမာရေးစောင့်ရှောက်မှုရရှိခြင်းကနေ တားမြစ်ရန် စစ်တပ်၏ စနစ်တကျကြိုးပမ်းမှုကို ပေါ်လွင်ထင်ရှားစေကြောင်း Amnesty International က သုံးသပ်သည်။
မြန်မာစစ်တပ်သည် အကူအညီပေးရေးဝန်ထမ်းများကို ဖမ်းဆီးခြင်း၊ အစားအသောက်၊ ဆေးဝါးနှင့် ကယ်ဆယ်ရေးပစ္စည်းများကို သိမ်းယူခြင်း သို့မဟုတ် ဖျက်ဆီးခြင်း သို့မဟုတ် သွားလာရေးကို ပိတ်ဆို့ခြင်း အပါအဝင် အကူအညီပေးရေးတုံ့ပြန်ဆောင်ရွက်ချက်များကို ကြိမ်ဖန်များစွာ ကန့်သတ်ခဲ့ကြောင်း လူသားချင်းစာနာမှုအကူအညီပေးရေးဝန်ထမ်းများက ပြောသည်။
(လေးကေ့ကော်ဒေသ တိုက်ပွဲကြောင့် ထိုင်းနိုင်ငံ မဲဆောက်မြို့သို့ သွားရောက်ခိုလှုံနေရသည့် မြန်မာစစ်ရှောင်များကို တွေ့ရစဥ်)