စစ်ကိုင်းတိုင်း၊ မင်းကင်းမြို့နယ်တွင် အကြမ်းဖက်စစ်ကောင်စီတပ်ကို တောင်တွင်းပြည်သူ့ကာကွယ်ရေးတပ်ဖွဲ့(မင်းကင်းမြို့နယ်) TDPDF(MinGin)နှင့်မင်းကင်းပြည်သူ့ကာကွယ်ရေးတပ်၊တပ်ရင်း ၂ တို့က ဒီဇင်ဘာ၁၆ တွင် ပူးပေါင်းတိုက်ခိုက်ရာ ၅ဦးထက်မနည်းသေဆုံးခဲ့ကြောင်းTDPDF ကထုတ်ပြန်သည်။
ဒီဇင်ဘာလ ၉ ရက်နေ့နှင့် ၁၀ ရက်နေ့တို့တွင် မင်းကင်းမြို့နယ်၊ တောင်တွင်းဒေသ မုံရွာ-ယာကြီး-ကလေးဝလမ်းပိုင်း၊ မိုင်တိုင်အမှတ် ၆၈ နှင့် ၇၆ မိုင် နှစ်နေရာတွင် ကနီ PDF ၂ နှင့်ပူးပေါင်း၍ စကစ များအား မိုင်းခွဲတိုက်ခိုက်ခဲ့ရာ စစ်ကောင်စီတပ်သား ၆၀ ခန့်သေဆုံးနိုင်ကြောင်း တောင်တွင်းပြည်သူ့ကာကွယ်ရေးတပ်ဖွဲ့(မင်းကင်းမြို့နယ်) TDPDF မင်းကင်းက အသိပေးသည်။
အဆိုပါတိုက်ခိုက်မှုတွင်အထိ့နာပြီးနောက်ဒီဇင်ဘာလ ၁၄ ရက် နံနက် ၁၀ နာရီခန့်မှစ၍ စကစတပ်များသည် တပ်ချောင်းရွာတွင် နေအိမ်၂လုံးအား မီးရှို့ဖျက်ဆီးခဲ့ပြီး ဝက်နှစ်ကောင်အား သတ်ဖြတ်စားသောက်ခဲ့ကြောင်း၊ ထို့နောက် ထုံးကြီးရွာတွင် ဦးခွန်နောင်နှင့်ဇနီးအား ရက်စက်စွာ မီးရှို့သတ်ဖြတ်ခဲ့ပြီး နေအိမ် ၃လုံးအား မီးရှို့ကာ နွားနှစ်ကောင်ကိုလည်း သတ်ဖြတ်သွားကြောင်း ထုတ်ပြန်ချက်တွင်ဖော်ပြထားသည်။ ထို့အပြင် စစ်ကောင်စီတပ်များသည် သစ်ခေါင်းတီးရွာတွင် နေအိမ် ၆ လုံး၊ ကျော်ရွာတွင်နေအိမ် ၁ လုံး၊ကြက်ခြံတစ်ခြံ၊ ဝက်ခြံတစ်ခြံ၊ မယ်မဲရွာတွင် နွားစာတိုက်တစ်လုံး၊ အနောက်ကိုင်းရွာတွင် နေအိမ်တစ်လုံးအား မီးရှို့ဖျက်ဆီးခဲ့ကြောင်း TDPDFက ပြောသည်။
အလားတူ ဒီဇင်ဘာလ ၁၅ ရက်နေ့တွင် စစ်ကြောင်းထိုးလာသောစစ်တပ်သည် ဂုံညင်းရွာတွင်နေအိမ်တစ်လုံး၊ ပိက္ခယားရွာတွင် နေအိမ်တစ်လုံး၊ မြေနီရွာတွင် နေအိမ် ၂ လုံးနှင့် ခင်ဦးရွာတွင် နေအိမ် ၇ လုံး၊ Church ကျောင်းတစ်ကျောင်းအား မီးရှို့ဖျက်ဆီးခဲ့ပြန်သည်။ ဒီဇင်ဘာလ ၁၆ ရက်နေ့တွင် မူ အဆိုပါ စစ်ကောင်စီစစ်ကြောင်းအား မိုင် ၁၀၀ အရောက်တွင် မင်းကင်းတပ်ရင်း ၂ နှင့် TDPDF မင်းကင်း တို့ပူးပေါင်းအဖွဲ့က တိုက်ခိုက်ခဲ့ရာ စကစတပ်သား ၅ ဦးထက်မနည်း သေဆုံးခဲ့ ပြီး ထိုစစ်ကြောင်းသည် ကလေးဝဘက်သို့ဆက်လက်ထွက်ခွာသွားကြောင်းTDPDF မင်းကင်းက ပြောသည်။
စစ်ကောင်စီတပ်များ၏ ယုတ်မာသောလုပ်ရပ်များကြောင့်
ပြည်သူတို့၏ အသက်အိုးအိမ်စည်းများ ဆုံးရှုံးရခြင်းအတွက် များစွာစိတ်မကောင်းဖြစ်ရကြောင်း၊ ပြည်သူတို့၏ အသက်အိုးအိမ်လုံခြုံရေးနှင့် ဖယ်ဒရယ်ဒီမိုကရေစီနိုင်ငံထူထောင်နိုင်ရေးအတွက် အသက်နှင့်ရင်း၍ ကြိုးစားဆောင်ရွက်သွားမည်ဟု ကတိသစ္စာပြုကြောင်း တောင်တွင်းပြည်သူ့ကာကွယ်ရေးတပ်ဖွဲ့(မင်းကင်းမြို့နယ်)က အသိပေးသည်။