စစ်ကိုင်းတိုင်း ပုလဲမြို့နယ်တွင် မိုင်းဆွဲတိုက်ခိုက်ခံရ၍ အထိနာနေသော အကြမ်းဖက်စစ်ကောင်စီတပ်သည် တိုက်ခိုက်ခံရသည့် နေရာနှင့်အနီးဆုံးကျေးရွာကို မီးရှို့ဖျက်ဆီးခဲ့ကြောင်း ပုလဲမြို့နယ် ပြည်သူ့ကာကွယ်ရေးတပ်ဖွဲ့ (PPDF)အဖွဲ့ခေါင်းဆောင် ဗိုလ်နဂါးက လူထုနွေဦးသို့ ပြောသည်။
ဒီဇင်ဘာ ၁၈ ရက်က ပုလဲမြို့မှ အနောက်ဘက်သို့ ထွက်ခွာလာသော စစ်ကောင်စီတပ်၏ ခြေလျင်ရှေ့ပြေးအဖွဲ့နှင့် ယာဥ်တန်းကို အဝေးထိန်းမိုင်းများဖြင့် PPDF က ဖောက်ခွဲတိုက်ခိုက်ခဲ့ခြင်းဖြစ်သည်။
“နဂါးမတောင်အကျော် မြစ်ကျတံတားနားမှာ တိုက်ပွဲ ဖြစ်ခဲ့တာ။သူတို့ သေဆုံးဒဏ်ရာရတာ တော်တော်များတယ်။ ဆွဲမိုင်းရော၊ တိုက်မိုင်းတွေပါထိတာ။ အဲဒါကြောင့် အနီးဆုံးရွာကိုဝင်တယ်။ နေအိမ်နဲ့ ဆိုင်ကယ်တွေကို မီးရှို့သွားတယ်”ဟု ဗိုလ်နဂါးက ပြောသည်။
အကြမ်းဖက်စစ်တပ်၏ မီးရှို့ဖျက်ဆီးမှုကြောင့် ဝမ်းပြင်ကျေးရွာနေအိမ် ခုနှစ်လုံးနှင့် ဆိုင်ကယ်လေးစီးခန့် ပျက်စီးခဲ့ကြောင်း သိရသည်။
Public Service Announcement
ယမန်နေ့က တိုက်ခိုက်မှုဖြစ်စဥ်တွင် အကြမ်းဖက်စစ်ကောင်စီတပ် ကားလေးစီးပျက်စီးခဲ့သည်ဟုလည်း PPDFက ထုတ်ပြန်သည်။
အဆိုပါ တိုက်ပွဲတွင် အဝေးထိန်းမိုင်း ၂၁လုံးအသုံးပြုဖောက်ခွဲတိုက်ခိုက်ခဲ့ကြောင်းလည်း PPDFက ဆိုသည်။
ဒီဇင်ဘာ ၁၇ ရက်ကလည်း စစ်ကောင်စီတပ်ကို ပုလဲPDF က ဗုံးခွဲတိုက်ခိုက်ခဲ့၍ ထိ့ခိုက်သေဆုံးမှုများကြောင်း ထုတ်ပြန်ထားသည်။
