အာဏာသိမ်းစစ်ကောင်စီအား တရားဝင်အစိုးရအဖြစ် အသိအမှတ်ပြုပြီးသံတမန်ရေးအရ လာရောက်နေသည့် နိုင်ငံတကာသံများ၊ နိုင်ငံတကာအဖွဲ့အစည်းများအား ပြင်းထန်စွာရှုတ်ချကြောင်း ပျဥ်းမနားတော်လှန်ရေးတပ်မတော်-PRA က ထုတ်ပြန်ကြေညာသည်။
ပျဥ်းမနားတော်လှန်ရေးတပ်မတော် PRAကဒီဇင်ဘာလ၂၁ ရက်နေ့တွင် ကြေညာချက်တစ်စောင် ထုတ်ပြန်ခဲ့ပြီးအဆိုပါကြေညာချက်တွင်အကြမ်းဖက် အာဏာသိမ်းစစ်ကောင်စီသည် ၂၀၂၀ ပြည့်နှစ် နိုဝင်ဘာလ ၈ ရက်နေ့တွင်ပြုလုပ်ခဲ့သည့် ပြည်သူ့ဆန္ဒခံယူပွဲမှထွက်ပေါ်လာသော အများပြည်သူရွေးချယ်ထားသည့် ရွေးကောက်ပွဲရလဒ်အား အသိအမှတ်မပြုဘဲ အတင်းအဓမ္မ အာဏာသိမ်းယူခဲ့ခြင်းသည် နိုင်ငံတကာဒီမိုကရေစီစံနှူန်းများကိုပြောင်ပြောင်တင်းတင်းချိုးဖောက်လိုက်ခြင်းဖြစ်သည်ဟု ရေးသားထားသည်။
အာဏာသိမ်းပြီးနောက်ပိုင်းတွင်လည်း ငြိမ်းချမ်းစွာဆန္ဒထုတ်ဖော်ခဲ့ကြသော အပြစ်မဲ့ပြည်သူများကို အာဏာသိမ်းစစ်ကောင်စီမှ လက်နက်အစစ်များအသုံးပြုပြီး အကြမ်းဖက်ခဲ့ခြင်းများ၊ ဥပဒေမဲ့ဖမ်းဆီးချုပ်နှောင်ခြင်း၊ နှိပ်စက်သတ်ဖြတ်ခြင်း၊ အပြစ်မဲ့ပြည်သူများကိုအစုလိုက်အပြုံလိုက် သတ်ဖြတ်ခြင်း၊ မြို့ရွာများကို မီးရှို့ဖျက်ဆီးခြင်း၊ စသည့်အချက်များသည်လည်း နိုင်ငံတကာလူ့အခွင့်အရေးစံချိန်များကို ပြောင်ပြောင်တင်းတင်းချိုးဖောက်နေခြင်းဖြစ်သည်ဟု ထုတ်ပြန်ချက်တွင် ဖော်ပြသည်။
ထို့အပြင် ဘာသာရေးဆိုင်ရာအဆောက်အဦးများ၊ ပြည်သူများနေထိုင်ရာ မြို့ရွာများအတွင်းသို့ လက်နက်ကြီးများဖြင့် ပစ်ခတ်ခြင်း၊ လေကြောင်းဖြင့်တိုက်ခိုက်ခြင်း၊ အဓမ္မ ဖမ်းဆီးထားသည့် အပြစ်မဲ့ပြည်သူများကို နှိပ်စက်သတ်ဖြတ်ခြင်းများသည် စစ်ရာဇဝတ်မှုကို ကျူးလွန်နေခြင်းလည်းဖြစ်ကြောင်းပါရှိသည်။
Public Service Announcement
ထိုကဲ့သို့ အပြစ်မဲ့ပြည်သူများအပေါ် လူ့အခွင့်အရေးများချိုးဖောက်ခြင်း၊ စစ်ရာဇဝတ်မှုကျူးလွန်ခြင်းများ ပြုလုပ်လျက်ရှိပြီး တရားဝင်မှုမရှိဘဲ အတင်းအဓမ္မ လက်နက်အားကိုးပြီး အာဏာသိမ်းယူထားသော အကြမ်းဖက်စစ်ကောင်စီအား တရားဝင်အစိုးရအဖြစ် အသိအမှတ်ပြုပြီး ၎င်းတို့ရုံးစိုက်ရာနေပြည်တော်သို့ သံတမန်ရေးအရ လာရောက်လေ့ရှိသော နိုင်ငံတကာသံများ၊ နိုင်ငံတကာအဖွဲ့အစည်းများအား ပြင်းထန်စွာရှုတ်ချကြောင်းနှင့် လူကြီးမင်းတို့၏ လုံခြုံရေးကို လုံးဝ(လုံးဝ) တာဝန်ယူမည်မဟုတ်ကြောင်း ပျဥ်းမနားတော်လှန်ရေးတပ်မတော် PRA က ထုတ်ပြန်ကြေညာကာ သတိပေးထားသည်။
