ရေဦးတွင် ဝေဟင်စွန်ရဲအဖွဲ့က စစ်​ကောင်စီတပ်ကိုနှစ်ရက်ဆက်တိုက်ခိုက်၊ အရာရှိအပါအဝင်ရှစ်ဦး​ခန့်သေနိုင်ဟု ထုတ်ပြန်

စစ်ကိုင်းတိုင်း ရေဦးမြို့နယ်တွင် စစ်​ကြောင်းထိုးနေသော အကြမ်းဖက်စစ်တပ်အား ရေဦးအခြေစိုက် ဝေဟင်စွန်ရဲပြောက်ကျားတပ်ဖွဲ့ကနှစ်ရက်ဆက်တိုက် ခုခံတိုက်ခိုက်ခဲ့ရာ စစ်ကောင်စီဘက်မှ အရာရှိတစ်ဦးအပါအဝင် ရှစ်ဦးခန့်သေဆုံးနိုင်ကြောင်း ဝေဟင်စွန်ရဲအဖွဲ့က သတင်းထုတ်ပြန်သည်။

ဒီဇင်ဘာ ၂၁ ရက် မွန်းလွဲ ၁နာရီခွဲအချိန်က ရေဦးမြို့နယ်အတွင်းသို့ ထိုးစစ်ဆင်လာသော အကြမ်းဖက်စစ်ကောင်စီစစ်ကြောင်းကို ရေဦးမြို့နယ် အခြေစိုက် ဝေဟင်စွန်ရဲတပ်ဖွဲ့မှ ရေဦးမြို့နယ် ကွမ်းအုံကျေးရွာနှင့် မိုးဒေါင်ကျေးရွာကြား မိုင်းဆွဲတိုက်ခိုက်ခဲ့ရာ စစ်ကောင်စီတပ်သား ၅ ဦးထက်မနည်း သေဆုံးပြီး ထိခိုက်ဒဏ်ရာများ ရရှိခဲ့ကြောင်း၊ ပြည်သူ့ကာကွယ်ရေးအဖွဲ့များ အထိအခိုက်မရှိ ဆုတ်ခွာနိုင်ခဲ့ကြောင်း အဆိုပါအဖွဲ့က အသိပေးသည်။

အလားတူ ဒီဇင်ဘာ ၂၂ ရက် နံနက် ၉ နာရီခန့်ကလည်း မိုးဒေါင်းသရက်ကန်ကျေးရွာမှ ညောင်ပင်သာကျေးရွာသို့ ဆက်၍ထိုးစစ်ဆင်လာသော စစ်ကြောင်းကို ရေဦးမြို့နယ်ညောင်ပင်သာကျေးရွာအဝင်၌ ဖောက်ခွဲတိုက်ခိုက်ရာ အရာရှိတစ်ဦးအပါအဝင် သုံးဦးထက်မနည်းသေဆုံးပြီး ထိခိုက်ဒဏ်ရာများ ရရှိသွားကြောင်း ရေဦးအခြေစိုက် ဝေဟင်စွန်ရဲပြောက်ကျားတပ်ဖွဲ့က ထပ်မံအသိပေးသည်။

အကြမ်းဖက်စစ်​ကောင်စီတပ်သည် ရေဦးမြို့နယ်အတွင်း ရဟတ်ယာဥ်များဖြင့်ပါပစ်ခတ်နေသဖြင့် ပြည်သူအချို့ ထိခိုက်မှုရှိနေသည်။ရေဦးမြို့နယ်အတွင်းရှိ လေးရွာအုပ်စု၊ ပလူဇဝအုပ်စု၊ ကွမ်းအုံအုပ်စု၊ ရေမျက်အုပ်စု၊ ဝသဲအုပ်စု၊ ခေါင်နွဲ့အုပ်စု၊ ပေကြီးအုပ်စု၊ တမတောအုပ်စု၊မကျီးနီအုပ်စုအပါအဝင် ကျေးရွာများမှ လူဦးရေသောင်းချီ စစ်ဘေးတိမ်းရှောင်နေရကြောင်း ဒေသခံများက ပြောသည်။

Public Service Announcement