ဘီးလင်းမြို့နယ်မှာ တောင်ယာထဲမှာ အလုပ်လုပ်ကိုင်နေတဲ့ ဒေသခံအမျိုးသမီးတစ်ဦးကို အကြမ်းဖက်စစ်ကောင်စီတပ်ဖွဲ့က ဖမ်းဆီးနှိပ်စက်ပြီး သေနတ်နဲ့ ပစ်သတ်ခဲ့တယ်လို့ ကရင်လူ့အခွင့်အရေးအဖွဲ့ (KHRG)ရဲ့ ထုတ်ပြန်ချက်အရ သိရပါတယ်။
ဒီဇင်ဘာ ၂၁ ရက် မနက် ၈ နာရီအချိန်က ကေအဲန်ယူ သထုံခရိုင် ဘီးလင်းမြို့နယ် နို့ဘယ်ဘောကျေးရွာအုပ်စု ထော်ကလော်ခီးကျေးရွာမှာ KNLA တပ်မဟာ ၁ နဲ့ စစ်ကောင်စီတပ်ဖွဲ့တို့ကြား နာရီဝက်ကြာ ထိတွေ့ပစ်ခတ်မှုဖြစ်ပွားခဲ့တာပါ။
တိုက်ပွဲမဖြစ်ပွားမီ အသတ်ခံရတဲ့ ဒေသခံအမျိုးသမီးရဲ့ တောင်ယာထဲမှာ KNLA တပ်ဖွဲ့တွေ သွားရောက်ခဲ့ပြီး အဲ့ဒီနောက် စစ်ကောင်စီတပ်က အဆိုပါတောင်ယာထဲကို ရောက်ရှိလာလို့ တိုက်ပွဲစတင်ဖြစ်ပွားခဲ့တာလို့ ထုတ်ပြန်ချက်မှာ ပါရှိပါတယ်။
နှစ်ဖက်တိုက်ပွဲဖြစ်ပွားနေစဉ်အတွင်း တောင်ယာထဲမှာ ခင်ပွန်းသည်နဲ့အတူ အလုပ်လုပ်ကိုင်နေတဲ့ ဒေသခံအမျိုးသမီးတို့ဟာ ထွက်ပြေးခဲ့ကြပြီးနောက် စစ်ကောင်စီက အဲ့ဒီအမျိုးသမီးကို ဖမ်းဆီးရမိခဲ့ကာ နှိပ်စက်ညှဉ်းပန်းပြီးတဲ့နောက် ပစ်သတ်လိုက်တယ်လို့ ထုတ်ပြန်ချက်မှာ ဖော်ပြထားပါတယ်။
Public Service Announcement
လက်ရှိမှာ အဆိုပါအမျိုးသမီးရဲ့ ခင်ပွန်းဖြစ်သူဟာ တောင်ယာထဲကို ပြန်မသွားရဲတော့ဘဲ ကျန်ရှိနေတဲ့ မိသားစုဝင်တွေဟာလည်း အသက်မွေးဝမ်းကျောင်း အခက်အခဲတွေကို ရင်ဆိုင်နေကြရတယ်လို့ KHRG ရဲ့ ထုတ်ပြန်ချက်အရ သိရပါတယ်။
