စစ်ကိုင်းတိုင်း ရေဦးမြို့နယ်ရှိကျေးရွာနှစ်ရွာသို့အကြမ်းဖက်စစ်ကောင်စီတပ်ဝင်ရောက်ပစ်ခတ်သောင်းကျန်းဖျက်ဆီးခဲ့သဖြင့် ပြည်သူတစ်ဦးသေဆုံးကာ တစ်ဦးပြင်းထန်ဒဏ်ရာများရရှိသွားပြီး နေအိမ်များလည်း ပျက်စီးသွားကြောင်း ဒေသခံများက ပြောသည်။
ယမန်နေ့(ဒီဇင်ဘာလ ၂၇ ရက်) နံနက်ပိုင်းက ရေဦးမြို့နယ် ထန်းတောရွာသို့ အကြမ်းဖက်စစ်ကောင်စီတပ်များ ရောက်ရှိလာပြီး ဝင်ရောက်ရှာဖွေမှုများပြုလုပ်ကာ နေအိမ်တစ်လုံးအား မီးရှို့ပြီး နောက်ထပ်နေအိမ်နှစ်လုံးအား ဖျက်ဆီးပြီး ထန်းတောရွာနေ ဦးအောင်ငြိမ်းဆိုသူအား စစ်ကောင်စီတပ်များက သေနတ်ဖြင့်ပစ်သတ်သွားခြင်းဖြစ်သည်။ ထို့အပြင် ကျန်အမျိူးသားတစ်ဦးကိုလည်း ရိုက်နှက်သဖြင့် ပြင်းထန်ဒဏ်ရာများရရှိသွားသောကြောင့်အသက်အန္တရာယ်စိုးရိမ်နေရကြောင်းဒေသခံများက ပြောသည်။
“အရိုက်ခံရတဲ့တစ်ယောက်က အခြေအနေ မကောင်းဘူး။ အသတ်ခံရတဲ့ ဦးလေးကလည်း အပြစ်မရှိပါဘူးဗျာ။ ရွာမြောက်ပိုင်းအကုန်မွှေခံရတာ ပစ္စည်းတွေလည်း အကုန်တင်သွားတာ”ဟု နယ်ခံတစ်ဦးက ပြောသည်။
အလားတူ ယမန်နေ့ကပင် စစ်ကိုင်းတိုင်း၊ မင်းကင်းနယ်ဘက်မှ ရေဦးနယ် ခင်ပင်၊ ရွာငယ်ဘက်သို့ အကြမ်းဖက်စစ်ကောင်စီတပ်သားများ ဝင်ရောက်လာပြီး ခင်ပင်ရွာမှ နေအိမ်အချို့ကိုဖျက်ဆီးကာ တစ်ရွာလုံးမွှေနှောက်ရှာဖွေခဲ့ကြောင်း၊ ရွာသူရွာသားများ ထွက်ပြေး တိမ်းရှောင်နေကြရကြောင်း ဒေသခံများက ပြောသည်။
Public Service Announcement
အကြမ်းဖက်စစ်တပ်သည် ရေဦးမြို့နယ်အတွင်းရှိ ကျေးရွာများအား ဒီဇင်ဘာ တတိယပတ်အတွင်းမှစတင်ကာ လေကြောင်းပစ်ခတ်မှုများကိုပါ ပြုလုပ်၍ ပြည်သူအချို့သေဆုံးထိခိုက်မှုများရှိနေပြီး ကျေးရွာအများအပြားမှပြည်သူထောင်ချီ ထွက်ပြေးတိမ်းရှောင်နေရသည်။
