စစ်ကိုင်းတိုင်း အရာတော်မြို့နယ် ဒုံဒစ်ကျေးရွာမှ စပါးခင်းများတွင် ခြွေလှေ့ရန် ရိတ်သိမ်းစုပုံထားသော ဒေသခံများ၏ စပါးများကို အကြမ်းဖက်စစ်ကောင်စီတပ်သားက မီးတင်ရှို့သွားကြောင်း အရာတော်မြို့နယ် သတင်းမှန်ပြန်ကြားရေးက ယနေ့(ဒီဇင်ဘာ ၃၁ ရက်)က ထုတ် ပြန်သည်။
အကြမ်းဖက်စစ်ကောင်စီတပ်သည် ပြည်သူ့ရိက္ခာအားအကြောင်းမဲ့ ဖျက်ဆီးသွားခြင်းမှာ ယမန်နေ့က ဒုံဒစ်အုပ်စုတွင် မိုင်းဆွဲတိုက် ခိုက်ခံရသဖြင့် အထိနာခဲ့ခြင်းကြောင့် ဖြစ်သည်ဟု ဒေသခံများက မှတ်ချက်ပြုသည်။
“ ပြည်သူတွေ မတွေ့ခဲ့တာ ကံကောင်းတယ်ပဲပြောရမယ်။ဒီခွေးတွေက ရှုံးမဲ မဲပြီး လုပ်ချင်ရာလုပ်နေကြတာ။ စပါးတင် ၁၀၀ ကျော် ၂၀၀ နီစပါးလောက်တော့ မီးရှို့ခံခဲ့ရတယ်” ဟု အရာတော်မြို့နယ်နေသူတစ်ဦးက ပြောသည်။
ဒီဇင်ဘာ ၃၀ ရက် ညနေပိုင်းက အရာတော်အရှေ့နယ် ဒုံဒစ်အုပ်စုတွင် စစ်ကောင်စီခြေလျင်စစ်ကြောင်း မိုင်းဆွဲတိုက်ခိုက်ခံရရာ စစ်ကောင်စီတပ်သား ၁၀ဦးထက်မနည်း သေဆုံးခဲ့သည်။
Public Service Announcement
စစ်ကောင်စီတပ်သားများက ဒဏ်ရာရရှိသူများနှင့် သေဆုံးများကို သယ်ယူပြီး ဆုတ်ခွာနေစဉ် အနီးရှိ ဒေသခံစပါးခင်းများတွင် ခြွေလှေ့ရန် ရိတ်သိမ်းစုပုံထားသော စပါးများကို မီးတင်ရှို့သွားခဲ့ခြင်းလည်းဖြစ်သည်။
စစ်ကောင်စီတပ်သားများ မိုင်းဆွဲတိုက်ခိုက်ခံရသည့် နေရာတွင်လည်း ကျန်ရစ်ခဲ့သော သွေးစွန်းစစ်ဦးထုပ်များ၊ ဝါးလုံးနှစ်လုံးဖြင့် ဆင်ထားသော ယာယီလူနာတင်ထမ်းစင် စသည်တို့ကိုလည်း တွေ့ရှိရသည်ဟုလည်း ထုတ်ပြန်ချက်တွင် ဖော်ပြသည်။
