ပုလဲ-ဂန့်ဂေါလမ်းပိုင်းတွင် စစ်ကောင်စီယာဥ်တန်းကို တိုက်ခိုက်ရာ အနည်းဆုံးနှစ်ဦးသေဟု ဗိုလ်ပုလဲပြော

ပုလဲ-ဂန့်ဂေါလမ်းပိုင်းတွင် အစီးရေ ၄၀ ကျော်ပါရှိသည့် အကြမ်းဖက်စစ်ကောင်စီယာဥ်တန်းကို မိုင်းဆွဲတိုက်ခိုက် ရာ ယာဥ်တစ်စီးပျက်စီးပြီး အနည်းဆုံး စစ်ကောင်စီတပ်သားနှစ်ဦးသေဆုံးကြောင်း Pake Joker PDFအဖွဲ့မှ ဗိုလ်ပုလဲက လူထုနွေဦးသို့ ပြောသည်။

ယနေ့(ဒီဇင်ဘာ ၃၁ ရက်)နံနက် ၁၀ နာရီခွဲခန့်တွင် ပုလဲ-ဂန့်ဂေါလမ်းပိုင်း၏ မင်းတိုင်းပင်ကျေးရွာနှင့် ကန်ဒေါင့် ကျေးရွာကြားတွင် ပဒေသာမိုင်းခြောက်လုံး အသုံးပြုတိုက်ခိုက်ခဲ့ခြင်းဖြစ်သည်။

“ယာဥ်မောင်းဘက်ခြမ်းကို တော်တော်ထိသွားတယ်။ခေါင်းခန်းက လူတွေတော့ သေဖို့များတယ်။ နောက်ခန်းမှာ စစ်သားတွေပါရင်တော့ ပိုပြီးထိခိုက်မယ်လို့ ခန့်မှန်းတယ်”ဟု ဗိုလ်ပုလဲက ပြောသည်။

တိုက်ခိုက်မှုဖြစ်စဥ်တွင် Pake Joker PDF အဖွဲ့မှ ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ ကြောင်းလည်း သိရသည်။

Public Service Announcement

ပုလဲ-ဂန့်ဂေါလမ်းပိုင်းတွင် အကြမ်းဖက်စစ်ကောင်စီ နှင့် ပြည်သူ့ကာကွယ်ရေးတပ်ဖွဲ့တို့ နေ့စဥ် ထိတွေ့မှုရှိနေသည်။

ထို့ကြောင့် ပုလဲ-ဂန့်ဂေါလမ်းပိုင်းကို ပြည်သူများအနေဖြင့် အသုံးမပြုရန်လည်း ပြည်သူ့ကာကွယ်ရေးတပ်များက မေတ္တာရပ်ခံထားသည်။