ကလေးမြို့နယ်တွင် အကြမ်းဖက်စစ်ကောင်စီက ယနေ့ညနေတွင် အင်တာနက်လိုင်းရော ဖုန်းလိုင်းပါ ဖြတ်တောက်ပြီး စစ်ကြောင်းထိုးနေကာ ပြည်သူများအား ဖမ်းဆီးသတ်ဖြတ်ခြင်းနှင့် နေအိမ်များအားမီးရှို့ဖျက်ဆီးခြင်းများ ပြုလုပ်နေကြောင်းဒေသခံများကပြောသည်။
ကလေးမြို့နယ် နတ်ချောင်းကျေးရွာအပါအဝင် ရွာငါးရွာကို စစ်ကောင်စီတပ် ယနေ့တွင်ထပ်မံစစ်ကြောင်းထိုးနေပြီး အကြမ်းဖက်တိုက်ခိုက်နေခြင်းဖြစ်သည်။
“ရွာထဲကနေ ရအောင် ထွက်ပြေးလာတဲ့သူတွေပြောပြတာက လမ်းပေါ်တွေမှာ ဒေသခံတွေရဲ့ ရုပ်အလောင်းတွေ တွေ့တယ်တဲ့။ကျွန်တော်နဲ့သိတဲ့ အိမ်နီးချင်း အမျိုးသမီးတွေလည်း ပစ်သတ်ခံထားရတယ်”ဟု နတ်ချောင်းကျေးရွာဒေသခံတစ်ဦးက People’s Spring သို့ပြောသည်။
နတ်ချောင်းရွာ တစ်ရွာတည်းတွင် စစ်ကောင်စီက သတ်ဖြတ်ထားသူ တစ်ရာဝန်းကျင်အထိရှိနေပြီဟု တောထဲတောင်ထဲတွင် စစ်ဘေးရှောင်နေရသည့် ဒေသခံများက ဒီဇင်ဘာ ၂၉ရက်တွင် ပြောထားသည်။
Public Service Announcement
အကြမ်းဖက်စစ်ကောင်စီသည် ဒီဇင်ဘာ တတိယလပတ်အတွင်း နတ်ချောင်းကျေးရွာကို လေကြောင်းကပါတိုက်ခိုက်ပြီး မြေပြင်တွင်လည်း နေအိမ်များအားမီးရှို့ဖျက်ဆီးခဲ့သည်။ ထို့ပြင် ဒေသခံများအနေဖြင့် စစ်ကောင်စီနှင့်မပူးပေါင်းပါက နေအိမ်များ မီးရှို့ခံရမည်ဟု ခြိမ်းခြောက်ထားပြီး စစ်ကြောင်းအကြိမ်ကြိမ်ထိုးကာ နေအိမ်များကိုမီးရှို့ဖျက်ဆီး၊လုယက်နေခြင်းဖြစ်သည်။
နတ်ချောင်း၊ ချောင်းခွ၊ ဟားခါးလေး၊ ရေစိုနှင့် ပန်းမွန်ချောင်း ကျေးရွာများသို့ စစ်ကြောင်းထိုးလာပြီး အရပ်သားများအား ဖမ်းဆီးသတ်ဖြတ်ခြင်း၊ နေအိမ်များမီးရှို့ဖျက်ဆီးခြင်း၊ အကြမ်းဖက်လုယက်ခြင်းများ ပြုလုပ်လျက်ရှိသဖြင့် ဒေသခံပြည်သူထောင်ပေါင်းများစွာ အကြမ်းဖက်စစ်ကောင်စီတပ်များ၏ ဘေးလွတ်ရာသို့ ထွက်ပြေးတိမ်းရှောင်နေရသည်ဟု PDF (Kalay)က ဒီဇင်ဘာ ၃၀ တွင် သတင်းထုတ်ပြန်ထားသည်။ယနေ့အခြေအနေကိုမူ PDFကလေးက ထုတ်ပြန်ခြင်းမရှိသေးပေ။
အကြမ်းဖက်စစ်ကောင်စီတပ်ကို PDF (Kalay) ၊ CNDF ၊ Zomi PDF နှင့် ပ.က.ဖ(ပြည်သူ့ကာကွယ်ရေးတပ်ဖွဲ့ )၊ ကလေးရိန်းဂျားတပ်ဖွဲ့ စသောပူးပေါင်းတပ်ဖွဲ့ များကပူးပေါင်းတိုက်ခိုက်နေသည်။ ထိုအပြင် စစ်ဘေးရှောင်ပြည်သူများကိုလည်းကူညီ ပြုစုစောင့်ရှောက်ပေးနေသည်ဟု PDF (Kalay)က သတင်းထုတ်ပြန်ထားသည်။
