ကယား(ကရင်နီ) ပြည်နယ် လွိုင်ကော်မြို့နေပြည်သူများ စစ်ဘေးတိမ်းရှောင်မှု တိုးလာနေကြောင်း အကူအညီပေးနေသည့်အဖွဲ့များက လူထုနွေဦးသို့ ပြောသည်။
ဇန်နဝါရီ ၇ရက်ကစ၍ လွိုင်ကော်မြို့ပေါ်တွင် အကြမ်းဖက်စစ်တပ်၏ မြို့တွင်းတိုက်ပွဲကြောင့် ဒေသခံများ သေဆုံးသဖြင့် ထွက်ပြေးတိမ်းရှောင်သူများတိုးလာခြင်းဖြစ်သည်။
“ဒီမနက်ထိ ထွက်ပြေးဖို့အတွက် စီစဥ်ပေးနေရတယ်။နောက်ပြီး စစ်တပ်က ရမ်းသမ်းပစ်မှာကြောက်လို့ အလံဖြူတွေလည်း ကားတိုင်းမှာထောင်ပြီးသွားနေရတယ်။ထောင်နဲ့ချီပြီး ပြေးနေရတာ။လောလောဆယ်စာရင်းက ပုံသေမရှိသေးဘူး။စစ်ရှောင်တွေက ထပ်တိုးနေဦးမှာပဲ”ဟု လွိုင်ကော်ကြက်ခြေနီအသင်းမှ တာဝန်ရှိသူတစ်ဦးက ရှင်းပြသည်။
ယနေ့(ဇန်နဝါရီ ၈ ရက်) နံနက်ပိုင်းအထိ လွိုင်ကော်မြို့ရှိ မိုင်းလုံး၊ရွာတန်းရှည်၊ပန်းကန် နှင့် ဒေါဆန်းဘွန်း ရပ်ကွက်နေပြည်သူ တစ်ထောင်ကျော်ကို ဘေးလွတ်ရာသို့ ပို့ဆောင်ပေးနေကြောင်း ၎င်းက ဆိုသည်။
Public Service Announcement
ကရင်နီပြည်နယ်တွင် စစ်ရှောင်အရေအတွက် ဆက် လက်တိုးမြင့်နေသည့်အတွက် ပြည်တွင်း၊ပြည်ပအဖွဲ့အစည်းများနှင့် လူပုဂ္ဂိုလ်များအနေဖြင့် ဝိုင်းဝန်းကူညီကြရန်လည်း ကရင်နီအဖွဲ့အစည်းများက မေတ္တာရပ်ခံသည်။
“စစ်ဘေးရှောင်တွေအတွက် အရေးပေါ် ရိက္ခာတွေဖြစ်တဲ့ ဆေးဝါးနဲ့စားစရာတွေက အရေးကြီးနေတယ်။နောက်ပြီး ရာသီဥတုကလည်း အရမ်းအေးတဲ့အတွက် စောင်တွေက မရှိမဖြစ်လိုတယ်”ဟု ကရင်နီအသံမှ တာဝန်ရှိသူတစ်ဦးက ပြောသည်။
စစ်တပ်က အာဏာသိမ်းပြီးနောက်ပိုင်း လက်ရှိအချိန်ထိ ကရင်နီဒေသ၌လူဦးရေ နှစ်သိန်းခန့် စစ်ဘေးရှောင်နေရကြောင်းလည်း ကရင်နီပြည်နယ် အတိုင်ပင်ခံကောင်စီက ဆိုသည်။
ယမန်နေ့က အကြမ်းဖက်စစ်ကောင်စီတပ်၏ လက်နက်ကြီး ပစ်ခတ်မှုကြောင့် လွိုင်ကော်မြို့ပေါ်တွင် နေအိမ်များထိခိုက်သည့်အပြင် အပြစ်မဲ့ပြည်သူ ခြောက်ဦး သေဆုံးခဲ့ရသည်။
ထို့အပြင် ပိတ်မိနေသည့် ပြည်သူများကို သွားရောက်ကယ်ဆယ်သည့် KNDF တပ်ဖွဲ့ဝင် ကျောင်းဆရာတစ်ဦးလည်း ကျဆုံးခဲ့ရသည်။
