စစ်ကောင်စီခန့် လူမှုဝန်ထမ်းကယ်ဆယ်ရေးနှင့်ပြန်လည်နေရာချထားရေးဝန်ကြီးဌာနဒုတိယဝန်ကြီး ဦးအောင်ထွန်းခိုင်နှင့် မိသားစုဝင်အားလုံး ကိုဗစ်ကူးစက်ခံရပြီးနောက် ဝန်ထမ်း၁၃ဦးတွင်လည်း ကိုဗစ်ရောဂါဖြစ်နေ၍ကုသမှုခံယူနေရသည်ဟု ယင်းဌာနမှ ဝန်ထမ်းအချို့က ပြောသည်။
စစ်ကောင်စီ၏ လူကယ်ပြန်ဒုဝန်ကြီး ဦးအောင်ထွန်းခိုင်နှင့် ၎င်း၏ မိသားစုဝင်များအားလုံးအား ဇန်နဝါရီလဆန်းရက်တွင် ကျန်းမာရေးစစ်ဆေးရာ ကိုရိုနာဗိုင်ရပ်စ်တွေ့ခဲ့ခြင်းဖြစ်သည်။ ထိုအပြင်ဌာနမှ ဝန်ထမ်းအချို့ ကျန်းမာရေးမကောင်း၍ ယမန်နေ့(ဇန်နဝါရီ ၈ရက်)က ထပ်မံစစ်ဆေးရာ ၁၃ ဦး၌ ပိုးတွေ့ကြောင်း လက်ရှိတာဝန်ထမ်းဆောင်နေသည့် ဝန်ထမ်းတစ်ဦးက ပြောသည်။
“သဇင်ဆောင်မှာ နေတဲ့ ဝန်ထမ်း၁၃ ယောက် ပိုးတွေ့တယ်။ သူတို့ကို သီးသန့်ထားတယ်”ဟု အထက်ပါဝန်ထမ်းက ပြောသည်။
ဦးအောင်ထွန်းခိုင်၏ လတ်တလောကျန်းမာရေးအခြေအနေနှင့် ဒေါ်သက်သက်ခိုင်ပါ ကူးစက်ခံရခြင်းရှိ၊မရှိကိုမူ မသိရသေးပေ။
Public Service Announcement
စစ်တပ်မှ အသွင်ပြောင်းလာသော ဦးအောင်ထွန်းခိုင်သည် ဒီချုပ်အစိုးရလက်ထက်တွင် သက်ပြည့်ပင်စင်ဖြင့် အငြိမ်းစားယူခဲ့သော်လည်း စစ်တပ်က နိုင်ငံတော်အာဏာအတင်းအဓမ္မသိမ်းပြီးနောက် လူကယ်ပြန်ဝန်ကြီးဌာန၏ ဒုတိယဝန်ကြီးနေရာ ပြန်ခန့်ခဲ့သည်။ စစ်ကောင်စီခန့်ဝန်ကြီးဒေါက်တာသက်သက်ခိုင်သည် အဂ်လိပ်ဘာသာစကားမပြောတတ်ခြင်းနှင့် စီမံခန့်ခွဲမှုမလုပ်တတ်ခြင်းကြောင့် စစ်ကောင်စီက ဦးအောင်ထွန်းခိုင်အား ခေါ်ယူကာ ဒုဝန်ကြီးရာထူးပေးအပ်ခဲ့ခြင်းဟု လူကယ်ပြန်ဌာနမှ အရာရှိတစ်ဦးက ပြောသည်။
အသက် ၆၅ နှစ်အရွယ် ဦးအောင်ထွန်းခိုင်အပါအဝင် လူကယ်ပြန်ဝန်ကြီးဌာနမှ ဒုညွှန်ချုပ်နှင့် ညွှန်ချုပ် အမျိုးသားအရာရှိများအားလုံးသည် စစ်တပ်မှအသွင်ပြောင်းများ ဖြစ်ပြီး ဒေါ်သက်သက်ခိုင်အား မျက်နှာလိုမျက်နှာရ လုပ်သည်ကလွဲ၍ ဌာနနှင့် သက်ဆိုင်သော အလုပ်များအပေါ် အာရုံမစိုက်ကြကြောင်းအောက်ခြေဝန်ထမ်းအချို့က ပြောသည်။
လူကယ်ပြန်ဝန်ကြီးဌာနသည် အရပ်သားအစိုးရလက်ထက် တွင်ဒေါက်တာဝင်းမြတ်အေး၏ ဦးဆောင်မှုဖြင့် ပြည်သူများအတွက်အစွမ်းကုန်ကြိုးစားဖြည့်ဆည်းခဲ့သဖြင့် ပြည်သူထောက်ခံမှုအများဆုံးရခဲ့သည့်ဌာနတစ်ခုဖြစ်ခဲ့သည်။အကြမ်းဖက် စစ်ကောင်စီလက်ထက်တွင်မူရွေးကောက်ပွဲတွင် မဲမရခဲ့သော ဒေါက်တာသက်သက်ခိုင်နှင့်အတူ ပြည်သူလူထု၏ ပြက်ရယ်ပြုမှုအများဆုံးရရှိသောဌာနတစ်ခုဖြစ်သည်။
