နိုင်ငံရေးအကျဉ်းသားဟောင်းတစ်ဦးက ဒလန်ပြန်လုပ်ပြီး စစ်ကောင်စီထံသတင်းပေးမှုကြောင့် လက်နက်များ သိမ်းဆည်းခံရကြောင်း ဖက်ဆစ်ဆန့်ကျင်ရေးလက်ရုံးတပ်ဖွဲ့က ယနေ့(ဇန်နဝါရီ ၁၃)တွင် ထုတ်ပြန်သည်။
လက်နက်ခဲယမ်းများ အရေးပေါ်ထားသိုရန်အတွက် ရန်ကုန်မြို့ မြောက်ဥက္ကလာပမြို့နယ် ရွှေပေါက္ကံမြို့သစ် (၁၆)ရပ်ကွက် တောင်ငူလမ်းရှိ အဆောင်တခု၌နိုင်ငံရေးအကျဉ်းသားဟောင်း မင်းလွင်(ခ)ကျီးကန်းက လက်ခံခဲ့သည်ဟု ဖက်ဆစ်ဆန့်ကျင်ရေး လက်ရုံးတပ်ဖွဲ့က ဆိုသည်။
သို့သော် ယမန်နေ့(ဇန်နဝါရီ ၁၂)က မင်းလွင်သည် သူပိုင်ဆိုင်ရာ အဆောင်၌ လက်နက်ခဲယမ်းများ မထားပေး နိုင်တော့ကြောင်းနှင့် ညတွင်းချင်း ရဲလက်အပ်တော့မည့်အကြောင်း ဖုန်းဆက်၍ ပြောဆိုလာခဲ့ကြောင်း ဖက်ဆစ်ဆန့်ကျင်ရေး လက်ရုံးတပ်ဖွဲ့သို့ အသိပေးခဲ့သည်။
“ကျနော်တို့သည် နိုင်ငံရေးအကျဉ်းသားဟောင်းလည်းဖြစ် တော်လှန်ရေးကို ကူညီမယ့်သူလို့ ယုံကြည်မိခဲ့သူဆီမှ ယခုလို ပြောဆိုလာသောအခါ အံ့ဩမဆုံးဖြစ်မိပါသည်။ သို့သော် အချိန်ကာလအားဖြင့်တကြောင်း ၊ သူ့အပေါ်မိမိတို့ရဲ့ ယုံကြည်မှုလျော့နည်းသွားခြင်း(ပစ္စည်းသွားရောက်သယ်ဆောင်ချိန် အလစ်ဝင်ဖမ်းခိုင်းမည်ကို စိုးရိမ်) တို့ကြောင့် တကြောင်း သူပိုင်ဆိုင်ရာ အဆောင်တွေရှိနေသည့် မိမိတို့ရဲ့ လက်နက်ခဲယမ်းများကို ရွေ့ပြောင်းဖို့ အလျင်မမိတော့ပါ”ဟု ဖက်ဆစ်ဆန့်ကျင်ရေး လက်ရုံးတပ်ဖွဲ့က ပြောသည်။
Public Service Announcement
ထို့နောက် ယမန်နေ့ည ၈နာရီခွဲအချိန်တွင် စစ်ကောင်စီအဖွဲ့ လက်ပါးစေများက လက်နက်ခဲယမ်းများကို သိမ်းဆည်းသွားခဲ့သည်။
ထို့အပြင် တော်လှန်ရေးနှင့်ဆက်စပ်ခြင်းမရှိသောအဆောင်၌ ငှားရမ်းနေထိုင်သူများကိုပါ စစ်တပ်က ဖမ်းဆီးသွားခဲ့ကြောင်း ထုတ်ပြန်ချက်၌ ပါရှိသည်။
ထို့ကြောင့် စစ်အာဏာရှင်ကို ဆန့်ကျင်နေကြသည့် နိုင်ငံရေးအသိုက်အဝန်းများ မိတ်ဆွေများနှင့် စစ်အာဏာရှင်ကို ဆန့်ကျင်နေကြသော ပြည်သူလူထုများမှ နိုင်ငံရေးအကျဉ်းသားဟောင်း မင်းလွင်ကို Social Punishmentပြုလုပ်ပေးရန် တောင်းဆိုထားသည်။
