စစ်ကိုင်းတိုင်း ပုလဲမြို့နယ်ရှိ ကျေးရွာများကို အကြမ်းဖက်စစ်ကောင်စီက လက်နက်ကြီးများအသုံး ပြု၍ ဝင်ရောက်စီးနင်းနေပြီး ပြည်သူအချို့ထိမှန်ဒဏ်ရာရရှိကြောင်းဒေသခံများက လူထုနွေဦးသို့ ပြောသည်။
ယနေ့(ဇန်နဝါရီ ၁၆ ရက်)နံနက် ၉နာရီက ပုလဲမြို့နယ် ကြောင်ဝင်ဒူးရွာနှင့် အောင်ချမ်းသာရွာသို့ အကြမ်းဖက်စစ်ကောင်စီက အင်အား ၆၀ခန့်ဖြင့်စစ်ကြောင်းထိုးဝင်ရောက်လာခြင်းဖြစ်သည်ဟု ၎င်းတို့က ဆိုသည်။
“သူတို့လာလို့ ရှောင်ကြတာကို မြင်သမျှပစ်တာ။သေနတ်သံမှစုံလို့ လက်နက်ကြီးနဲ့ရော ပါပစ်တာ”ဟု ထွက်ပြေးနေရသည့် ကြောင်ဝင်ဒူးရွာခံ အမျိုးသမီးတစ်ဦးက ရှင်းပြသည်။
လက်ရှိတွင် ကြောင်ဝင်ဒူးရွာ၌ အကြမ်းဖက်စစ်ကောင်စီတပ်က တပ်စွဲနေသည့်အတွက် ရွာခံအားလုံးထွက်ပြေးခဲ့ရသည်ဟုလည်း ၎င်းက ဆိုသည်။
“ကျွန်တော်တို့ ရွာမှာစုစုပေါင်း လူဦးရေ ၄၀၀ ကျော်ရှိတယ်။အကုန် ပြေးနေရတာ။ပြီးတော့ ကျွန်တော်တို့ရွာနဲ့ တက်နေတဲ့ အောင်ချမ်းသာ ရွာကလူတွေပါ မနေနိုင်လို့ ပြေးနေကြရပြီ”ဟု ဒေသခံတစ်ဦးက ပြောသည်။
အကြမ်းဖက်စစ်ကောင်စီတပ်သည် ၎င်းတို့အား အထိနာအောင်တော်လှန်နိုင်နေသည့် ပုလဲမြို့နယ်ကို ယခုလ က စ၍ စစ်ကြောင်း၊လေးကြောင်းဖြင့် ထိုးစစ်ဆင်နေသည်။
ထို့အပြင် ပုလဲမြို့နယ်၏ နာမည်ကျော် ဗိုလ်နဂါးကို ရဟတ်ယာဥ် လေးစီးအသုံးပြုကာ ပိတ်ဆို့ဖမ်းဆီးမှုပင်ပြုလုပ်ခဲ့ရသော်လည်း အောင်မြင်မှုမရှိခဲ့ပေ။