အာဏာသိမ်းစစ်ကောင်စီတပ်က စစ်ရှောင်စခန်းများကို ပစ်မှတ်ထားတိုက်ခိုက်လာ၍ ကရင်နီလူထုများအနေဖြင့် သတိရှိကြရန်လိုအပ်ကြောင်း ကရင်နီတပ်မတော်(KA) စစ်ဦးစီးချုပ် ဗိုလ်ချုပ်ဘီထူးက အသိပေးတိုက်တွန်းထားကြောင်း ကရင်နီအမျိုးသားတိုးတက်ရေးပါတီ (KNPP) သတင်းနှင့် ပြန်ကြားရေးဌာနက သတင်းဖော်ပြသည်။
စစ်ကောင်စီတပ်သည် ဇန်နဝါရီ ၁၇ရက်တွင် ဖရူဆို အနောက်ဘက်ခြမ်းရှိ စစ်ရှောင်စခန်းနှစ်ခုကို လေယာဉ်ဖြင့်ဗုံးကြဲတိုက်ခိုက်ခဲ့၍ စစ်ရှောင်သုံးဦး သေဆုံးခဲ့ရာယင်းဖြစ်စဉ်နှင့်ပတ်သက်ပြီး KNPP လက်အောက်ခံတပ် ဖြစ်သည့် KA စစ်ဦးစီးချုပ်က ယခုကဲ့သို့ သတိပေးခြင်းဖြစ်သည်။
ဗုံးကြဲတိုက်ခိုက်ခံရသည့် စစ်ရှောင်စခန်းနှစ်ခုမှာ ပျက်စီးသွားခဲ့ပြီး အနီးတ၀ိုက်ရှိ စစ်ဘေးရှောင်များလည်း စခန်း၌ မနေရဲဘဲဖြစ်နေကြောင်း KNPP၏ သတင်းနှင့် ပြန်ကြားရေးဌာန KNICက ဖော်ပြသည်။
စစ်တပ်အာဏာသိမ်းပြီးနောက်ပိုင်း စစ်ကောင်စီတပ်ကို ပြင်းပြင်းထန်ထန် ခုခံတိုက်ခိုက်ခဲ့သည့် ကရင်နီဒေသတွင် ဒေသခံ ပြည်သူသိန်းနှင့်ချီ၍ စစ်ဘေးတိမ်းရှောင်နေကြရသည်။ ကရင်နီဒေသများဖြစ်သော လွိုင်ကော်၊ ဒီးမော့ဆို၊ ဖယ်ခုံနှင့် ဖရူဆိုဒေသများ၌ ဒေသခံများ စစ်ဘေးဒုက္ခကြုံတွေ့နေရပြီး အခက်အခဲများစွာ ရင်ဆိုင်နေကြရသည်။