ကော့ကရိတ်မြို့နယ်အတွင်းမှာ ကရင်အမျိုးသားလွတ်မြောက်ရေးတပ်မတော် KNLA နဲ့ စစ်ကောင်စီတပ်တို့အကြား တိုက်ပွဲတွေဆက်ဖြစ်နေပြီး စစ်ကောင်စီရဲ့ စစ်ဆင်ရေးလှုပ်ရှားမှုကြောင့် စစ်ဘေးရှောင်ဦးရေ နှဆခွဲလောက်ပိုတိုးလာခဲ့ပြီး အကူအညီတွေလိုအပ်နေတယ်လို့ ကရင်လူ့အခွင့်အရေးအဖွဲ့(KHRG)ဆီကနေ သိရပါတယ်။
အခုရက်ပိုင်းတွေအတွင်း ကေအဲန်ယူထိန်းချုပ်နယ်မြေဖြစ်တဲ့ ဒူးပလာယာခရိုင် ကော့ကရိတ်မြို့နယ်ထဲမှာ KNLA တပ်မဟာ ၆ နဲ့ အာဏာသိမ်းစစ်ကောင်စီတပ်တို့အကြား တိုက်ပွဲတွေပြင်းထန်နေပြီး စစ်ကောင်စီဘက်က လက်နက်ကြီးပစ်ခတ်မှုတွေအပြင် လေယာဉ်နဲ့ပါလာရောက်တိုက်ခိုက်မှုတွေ လုပ်ဆောင်နေခဲ့တာပါ။
စစ်ကောင်စီဘက်က လေယာဉ်နဲ့ လက်နက်ကြီးပစ်ခတ်မှုတွေ လုပ်ဆောင်လာခဲ့တာကြောင့် ကော့ကရိတ်မြို့နယ်ထဲက ကော့နွဲ့ အံကလော် မြို့ဟောင်း မိဂသိန်၊ ကမိုင်ကုန်း၊ ရွာသစ်စတဲ့ ကျေးရွာ ၁၀ ကျော်က ဒေသခံပြည်သူတွေဟာ ဘေးလွတ်ရာကို ထွက်ပြေးတိမ်းရှောင်နေခဲ့ရတာဖြစ်ပါတယ်။
စစ်ဘေးရှောင်ဦးရေဟာ အရင်က (၂၀၀၀) ဝန်းကျင်ရှိရာကနေ အခုရက်ပိုင်းထဲ စစ်ကောင်စီဘက်က လေယာဉ်နဲ့လာတိုက်ခိုက်မှုတွေ ပိုလုပ်လာခဲ့လို့ ထွက်ပြေးတိမ်းရှောင်သူဦးရေ ပိုမိုများပြားလာခဲ့ပြီး လက်ရှိမှာ ကော့ကရိတ်မြို့နယ်ထဲမှာ စစ်ရှောင်ဦးရေဟာ (၅၀၀၀) အထိရှိလာတယ်လို့ ကရင်လူ့အခွင့်အရေးအဖွဲ့(KHRG)က ပြောခွင့်ရသူ စောနန္ဒဆူးက ပြောပါတယ်။
Public Service Announcement
“တိုးလာတယ် ၂၀၀၀ ကနေ ၅၀၀၀။ လေကြောင်းနဲ့တိုက်ကတည်းက သူတို့က မနေရဲတော့ဘူး။ ခန့်မှန်းချက်ပေါ့လေ ၅၀၀၀ အဲ့လောက်ရှိတယ်လို့တော့ပြောကြတယ်။ လေကြောင်းတိုက်ခိုက်မှုရော မြေပြင်တိုက်ခိုက်မှုရော လုပ်နေတယ်” လို့ စောနန္ဒဆူးက ပြောပါတယ်။
စစ်ကောင်စီရဲ့ ထိုးစစ်ဆင်မှုတွေကြောင့် ထွက်ပြေးတိမ်းရှောင်နေရတဲ့ ဒေသခံရွာသားတွေအတွက် အခက်အခဲကြုံနေရပြီး စားနပ်ရိက္ခာ ဆေးဝါး အမိုးအကာစတဲ့ အကူအညီတွေ လိုအပ်နေတယ်လို့ သိရပါသေးတယ်။
ကော့ကရိတ်မြို့နယ်ထဲမှာ စစ်ကောင်စီရဲ့ လက်နက်ကြီးပစ်ခတ်မှုနဲ့ လေကြောင်းတိုက်ခိုက်မှုကြောင့် အရပ်သားတစ်ဦးသေဆုံးသွားခဲ့ပြီး ၁၀ ကျော် ထိခိုက်ဒဏ်ရာရရှိခဲ့ကာ လူနေအိမ်၊ အဆောက်အဦးနဲ့ ဘုန်းကြီးကျောင်းတွေလည်း ပျက်စီးသွားခဲ့တယ်လို့ ဒေသခံတွေရဲ့ ပြောကြားချက်အရ သိရပါတယ်။
