မကွေးတိုင်း ဂန့်ဂေါမြို့နယ် စန်းမြို့ရွာကို စစ်ကောင်စီတပ်က မီးရှို့ဖျက်ဆီးခဲ့ကြောင်း နှမ်းခါးလူငယ်အဖွဲ့က ထုတ်ပြန်သည်။
စစ်ကောင်စီတပ်နှင့် ပျူစောထီး၊ ဒလန်များပူးပေါင်း၍ စန်းမြို့ရွာသို့ ယနေ့(ဇန်နဝါရီ ၁၈)မွန်းလွဲ ၁နာရီခွဲခန့်တွင် ကျေးရွာသို့ ဝင်ရောက်ကာ အပြစ်မဲ့ပြည်သူလူထု နေအိမ်များကို ရွာလုံးကျွတ်နီးပါး မီးတိုက်ဖျက်ဆီးခဲ့ကြောင်း၊ ပြည်သူများ ဘေးလွတ်ကင်းရာသို့ တိမ်းရှောင်နေကြရကြောင်း ဖော်ပြထားသည်။
စန်းမြို့ရွာ စစ်ဘေးရှောင်ပြည်သူများအတွက် အဝတ် အထည်၊ စားနှပ်ရိက္ခာအပါအဝင် အရေးပေါ် အကူအညီများ ထောက်ပံ့ကူညီပေးကြရန်လည်း တိုက်တွန်းတောင်းဆိုထားသည်။
Gangaw Youths Voice၏ ဖော်ပြချက်တွင်လည်း အင်အား ၁၀၀ခန့်ဖြင့် ဝင်ရောက်စီးနင်းလာသည့် စစ်ကောင်စီနှင့် ပျူစောထီးများက စန်းမြို့ရွာကို မီးရှို့ဖျက်ဆီးခဲ့ကြောင်း၊ ဒေသခံများဖမ်းဆီးခံရမှု ရှိ၊မရှိနှင့် ထိခိုက်ပျက်စီးဆုံးရှုံးမှု အခြေအနေများ အတိအကျ မသိရသေးကြောင်း ဖော်ပြထားသည်။
Public Service Announcement
စစ်ကောင်စီတပ်သည် ဂန့်ဂေါနယ်ရှိ ကျေးရွာများကို ဝင်ရောက်စီးနင်းပြီး ဒေသခံများအားအကြမ်းဖက်ခြင်း၊ ကျေးရွာများကို မီးရှို့ခြင်းများ မကြာခဏ လုပ်ဆောင်ခဲ့သည်။
စစ်ကောင်စီတပ်သည် ၂၀၂၁ ဒီဇင်ဘာလအတွင်းကလည်း စန်းမြို့ရွာရှိနေအိမ် ၂၀ကျော်ကို မီးရှို့ဖျက်ဆီးခဲ့သည်။
