စစ်ကိုင်းတိုင်း ထီးချိုင့်မြို့နယ်၌ အကြမ်းဖက် စစ် ကောင်စီယာဥ်တန်းကို ဗုံးခွဲတိုက်ခိုက်ရာ သေဆုံးသူများ ပြားနိုင်သည်ဟု ထီးချိုင့်မြို့နယ်ပြည်သူ့ကာကွယ်ရေးတပ်ဖွဲ့ဝင်တစ်ဦးက လူထုနွေဦးသို့ ပြောသည်။
ထီးချိုင့်မြို့နယ်ရှိ တည်တောရွာသို့ သွားရောက်စစ်ဆေးပြီး မြို့အတွင်းသို့ ပြန်လည်ဝင်ရောက်လာသော အကြမ်းဖက်စစ်ကောင်စီ၏ (၁၂ ဘီးယာဥ်)တွဲကားလေးစီးပါ ယာဥ်တန်းကို တိုက်ခိုက်ခဲ့သည်ဟု ၎င်းက ဆို သည်။
“မနေ့က ညနေ ၆ နာရီလောက်မှာ မိုင်းဆွဲတိုက် တယ်။ခွဲတာ နှစ်လုံးခွဲတာ။သူတို့ ပြန်ဝင်မယ့်အချိန်ကို စောင့်တာပေါ့။လေးစီးမှာ စခအင်အားက ၅၀ ကျော်ပါလာတယ်။နှစ်စီးကို ထိထိမိမိထိတယ်။ သေဆုံးစာရင်းကို မသေချာမှာဆိုးလို့ မပြောသေးတာ။ဒါပေမယ့် ညတွင်းချင်း (၇)မိုင်က တပ်ဆေးရုံကို ပို့ရတာတွေအများကြီးပဲ”ဟု အထက်ပါတပ်ဖွဲ့ဝင်တစ်ဦးက ရှင်းပြသည်။
တိုက်ခိုက်မှုဖြစ်စဥ်တွင် မိုင်းဆွဲခံရသည့် အကြမ်းဖက်စစ်ကောင်စီတပ်သည် လက်နက်ငယ်အပါအဝင် ၆၀(မမ)ဖြင့် ရမ်းသမ်းပစ်ခတ်မှုများရှိခဲ့ကြောင်းလည်း ထီးချိုင့်မြို့ခံ သတင်းရင်းမြစ်များက ဆိုသည်။
Public Service Announcement
“မနေ့က ညနေ ၆နာရီခွဲလောက်မှာမြို့ဝင်ဂိတ်ကနေ ဆေးရုံ အသစ်ဘက် တည်တောရွာဘက်ကို ပစ်ကြတာ။ပြီးတော့ မြို့ထဲမှာလည်း ပိတ်စစ်တာတွေရှိခဲ့တယ်”ဟု ထီးချိုင့် ဒေသခံတစ်ဦးက ပြောသည်။
ဒေသခံပြည်သူတပ်ဖွဲ့များအားကောင်းသည့် ထီးချိုင့်မြို့နယ်ရှိ ကျေးရွာများကို အကြမ်းဖက်စစ်ကောင်စီက လေယာဥ်ဖြင့် ဗုံးကြဲတိုက်ခိုက်မည်ဟု အကြိမ်ကြိမ် ခြိမ်းခြောက်ထားသည်။
