စစ်ကိုင်းတိုင်း ကသာမြို့နယ် မှတ်တိုင်ကျေးရွာကို အကြမ်းဖက်စစ်ကောင်စီတပ်က စစ်လေယာဥ်ဖြင့် ဗုံးကြဲတိုက်ခိုက်ခဲ့ပြီး ကလေးငယ်တစ်ဦး အပါအဝင်နှစ်ဦးထိခိုက်ဒဏ်ရာများရရှိခဲ့ပြီး ဘုရားစေတီအချို့လည်းထိခိုက်ပျက်စီးခဲ့ကြောင်း ဒေသခံများက ပြောသည်။
အာဏာသိမ်းစစ်ကောင်စီတပ်က ကသာမြို့နယ် မှတ်တိုင်ကျေးရွာရွာဦးရှိ လောကသရဖူ ဘုရားကုန်းတွင်တည်ထား ကိုးကွယ်သော စေတီတော်နှင့် အာရုံခံ တန်ဆောင်း အပါအဝင် အနီးနားရှိနေရာများကိုယမန်နေ့ (ဇန်နဝါရီ ၁၈ ရက် )မွန်းလွဲ ၂ နာရီ ၂၈ မိနစ်ခန့်ကဂျက်လေယာဥ်ပေါ်မှ စစ်သေနတ်ဖြင့်ပစ်ပြီး ဗုံးနှစ်လုံးကြဲခဲ့သည်။
စစ်ကောင်စီ၏ လေကြောင်းမှ တိုက်ခိုက်မှုကြောင့် စေတီတော်ကြီးနှင့်အရံစေတီ၁ဆူအားထိမှန်ပြီး ဘုရားအရံတံတိုင်းနှင့်အာရုံခံအမိုးသွပ်များပေါက်ပြဲခဲ့ကြောင်း Katha Revolution -IRက သတင်းထုတ်ပြန်သည်။
ထို့အပြင် လေကြောင်းမှပစ်ခတ်တိုက်ခိုက်မှုကြောင့် ဇရစ်ခူးပြန်လာသူ ဦးတောင်(၅၀)နှစ်မှာနှဖူးထိမှန်ခဲ့သလို၊ ဘုရားရင်ပြင်တွင်ဆော့ကစားနေသော အသက် ၈ နှစ်အရွယ်မောင်ကျော်ဝေမိုးမှာ ကျောကုန်းတွင်ဗုံးစထိမှန်ခဲ့သည်။ဗုံးစ ထိမှန်ခဲ့သော ရွာသား ၂ ဦးအား Katha Medical Team မှဆေးကုသပေးနိုင်ခဲ့ကြောင်းထုတ်ပြန်ချက်တွင်ဖော်ပြထားသည်။
Public Service Announcement
ယမန်နေ့ ည ၈ နာရီအချိန်ခန့်တွင် ကသာမြို့နယ်၊ အင်းရွာ ကျေးရွာ၌ တပ်စွဲထားသော စစ်ကောင်စီတပ်များ ကင်းလှည့်လာချိန်တွင် ကသာမြို့နယ် ပြည်သူ့ကာကွယ်ရေးတပ်ဖွဲ့ (ပကဖ)များနှင့်ထိတွေ့တိုက်ပွဲဖြစ်ပွားခဲ့သည်။စစ်ကောင်စီတပ်သားများဘက်မှထိခိုက်ဒဏ်ရာအများအပြားရှိခဲ့ပြီး မိမိတို့တပ်ဖွဲ့များ ထိခိုက်မှုမရှိပြန်လည်ဆုတ်ခွာလာနိုင်ခဲ့ကြောင်း ကသာမြို့နယ် ပြည်သူ့ကာကွယ်ရေးတပ်ဖွဲ့ (ပကဖ)က သတင်းထုတ်ပြန်သည်။
ယနေ့ (ဇန်နဝါရီ ၁၉ ရက်) နံနက် ၄ နာရီခန့်တွင် အင်းရွာကျေးရွာ၌ တပ်စွဲထားသော အကြမ်းဖက်စစ်ကောင်စီတပ်သည် အင်းရွာကျေးရွာနေ ပြည်သူတစ်ဦး၏ နေအိမ်ပရိဘောဂများအားဖျက်ဆီးခဲ့ပြီး အပြန်တွင် နေအိမ်ကိုပါမီးရှို့ဖျက်ဆီးသွားခဲ့ကြောင်း KATHA Revolution – IR က ပြောသည်။
