စစ်ကိုင်းတိုင်း ရေဦးမြို့နယ်ရှိ ကျေးရွာများအား စစ်ကောင်စီတပ်မှ ဝင်ရောက်စီးနင်းမှုများလုပ်ဆောင်လျက်ရှိရာ ချမ်းသာရွာအနီးတွင် မိုင်းဆွဲတိုက်ခိုက်ခဲ့ကြောင်း ရေဦးအခြေစိုက် မြို့ပြပြောက်ကျားတပ်ဖွဲ့တစ်ခုဖြစ်သော ဝေဟင်စွန်ရဲ(ရေဦး)က လူထုနွေဦးသို့ ပြောသည်။
အင်အား ၄၀ကျော်ပါဝင်သည့် စစ်ကောင်စီတပ် ခြေလျင်စစ်ကြောင်းသည် ထန်းပင်ကုန်းရွာမှတစ်ဆင့် ရထားသံလမ်းအတိုင်း စစ်ကြောင်းထိုးလာရာ ယနေ့ (ဇန်နဝါရီ ၂၀)နေ့လယ် ၁ နာရီခန့်က ချမ်းသာရွာအနီးသို့အရောက်တွင် ပဒေသာမိုင်းသုံးလုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ဝေဟင်စွန်ရဲအဖွဲ့က ပြောသည်။
“ထန်းပင်ကုန်းကျေးရွာကနေ သံလမ်းတလျောက်ခြေလျင်ဆင်းလာတာပါဗျ။ စစ်ခွေးအင်အား ၄၀ ကျော်ပါ။ သံလမ်းလျောက်မိုင်းဆွဲခံရပြီး ၇ ဦးသေ၍ ထိခိုက်ဒဏ်ရာများရရှိထားပါတယ်”ဟု ဝေဟင်စွန်ရဲ(ရေဦး) မြို့ပြပြောက်ကျားတပ်ဖွဲ့မှ တာဝန်ရှိသူတစ်ဦးက ပြော သည်။
အထက်ပါတိုက်ခိုက်မှုများကို ဝေဟင်စွန်ရဲ(ရေဦး)၊ ပြည်သူ့ကာကွယ်ရေးတပ်ဖွဲ့(ရေဦး)အပါအဝင် ဧရာအရှေ့ခြမ်း ဒေသကာကွယ်ရေးတပ်များ ပူးပေါင်းတိုက်ခိုက်ခဲ့ခြင်းဖြစ်ပြီး ၎င်းတို့ဘက်မှ ထိခိုက်ဒဏ်ရာရရှိမှုမရှိဘဲ အောင်မြင်စွာ ဆုတ်ခွာနိုင်ခဲ့ကြောင်း သိရသည်။
Public Service Announcement
တိုက်ခိုက်ခံရသည့် စစ်ကောင်စီတပ်များသည် ချမ်းသာရွာသို့ဝင်ရောက် သောင်းကျန်းခဲ့ကြပြီး ချမ်းသာရွာခံဦးကြည်လင်းဆိုသူအား ဖမ်းဆီးသွားကြောင်း ဒေသကာ ကွယ်ရေးတပ်ဖွဲ့များက အတည်ပြုသည်။
စစ်ကောင်စီတပ်များသည် ဇန်နဝါရီ ၁၀ရက်ကလည်း ချမ်းသာရွာသားနှစ်ဦးကို အကြောင်းမဲ့ ပစ်သတ်ခဲ့ကြပြီး နေအိမ်များဖောက်ထွင်းကာ အတွင်းပစ္စည်းများ ယူဆောင်သွားခဲ့ကြသည်။
ထို့အပြင် ယမန်နေ့(ဇန်နဝါရီ ၁၉)ည ၇ နာရီခန့်က ရေဦးမြို့နယ် လက်လန်တံတားအနီးရှိ လမ်းဘေးဆိုင်ခန်းများအား မီးရှို့ဖျက်ဆီးခဲ့သေးသည်။
လက်ရှိအခြေအနေတွင် အကြမ်းဖက်စစ်ကောင်စီက ကျေးရွာများအတွင်း ဝင်ရောက်စီးနင်းခြင်း၊ ဖမ်းဆီးခြင်းနှင့် သတ်ဖြတ်ခြင်းတို့ကြောင့် ဘေးလွတ်ရာတိမ်းရှောင်နေရသည့် ဒေသခံပြည်သူ ၁၀၀၀ ဦးခန့်ရှိကြောင်း ဒေသကာကွယ်ရေးတပ်ဖွဲ့များထံမှ သိရသည်။
