စစ်ကောင်စီတပ်မှ တပ်ကြပ်ရာထူးရှိတစ်ဦး လက်နက်နှင့်အတူလာရောက်ကာ အာဏာဖီဆန်ရေးလှုပ်ရှားမှု (CDM)တွင် ပါဝင်လာကြောင်း ဖရူဆိုမြို့နယ် ပြည်သူ့ကာကွယ်ရေးတပ်ဖွဲ့(PDF)က ယနေ့ ထုတ်ပြန်သည်။
ကယား(ကရင်နီ)ပြည်နယ် ဖရူဆိုမြို့နယ်အခြေစိုက် စကစတပ်ရင်းတစ်ခုမှ (၄၉)နှစ်အရွယ် တပ်ကြပ်တစ်ဦးသည် ဇန်နဝါရီ၂၂ ရက်တွင် ဖရူဆို PDFထံ သေနက်တစ်လက်၊ ကျည် ၁၀၁တောင့်၊ကျည်အိမ် လေးခု၊လက်ပစ်ဗုံးသုံးလုံးဖြင့် CDM ဝင်ရောက်လာခဲ့၍ ဆုကြေးငွေများ ချီးမြှင့်ပြီး ကောင်းမွန်စွာလုံခြုံသည့်နေရာသို့ ပို့ဆောင်ထားသည်ဟု ဖော်ပြထားသည်။
အဆိုပါ တပ်ကြပ် CDM ဝင်ရောက်လာခြင်းမှာ စစ်ကောင်စီတပ်က ဖရူဆိုမြို့နယ် မိုဆိုရွာအနီး၌ စစ်ရှောင်ပြည်သူ အချို့ကို အရှင်လတ်လတ် မီးရှို့သတ်ဖြတ်ခြင်း၊ စစ်ရှောင်စခန်းရှိ ပြည်သူများကို လေယာဉ်ဖြင့် ဗုံးကြဲသတ်ဖြတ်သည့် ဖြစ်ရပ်တို့ကို သိရှိရပြီး စစ်အာဏာ ရှင်၏ မတရားလုပ်ရပ်များအပေါ် စိတ်နာ၍ ဖြစ်ကြောင်း ကာယကံရှင်က ပြောကြားသည်ဟု ဖရူဆို PDFက ထုတ်ပြန်သည်။
CDM ဝင်လာသည့် တပ်ကြပ်အနေဖြင့် စစ်အာဏာရှင်များကို ပြန်လည်တိုက်ခိုက်တော်လှန်သွားမည်ဟုလည်း ပြောကြားကြောင်း ဖော်ပြထားသည်။