စစ်ကိုင်းတိုင်း ယင်းမာပင်ခရိုင်အတွင်းရှိ ကျေးရွာပေါင်းစုံသပိတ်စစ်ကြောင်းသည် ယနေ့(ဇန်နဝါရီ ၂၃) နံနက်ပိုင်း၌ အကြမ်းဖက် စစ်အာဏာရှင် ဆန့်ကျင်ရေး ရက်ပေါင်း (၃၁၉)ရက်မြောက်နေ့အဖြစ် ဆက်လက် ချီတက်ဆန္ဒပြကြသည်။
ယင်းသပိတ်စစ်ကြောင်းတွင် “ဖက်ဒရယ်ဒီမိုကရေစီပြည်ထောင်စု မုချတည်ဆောက်နိုင်ရမည်”၊ “အာဏာရှင်စနစ်ဟူသမျှ ကျရှုံးရမည်” စသည့် ကြွေးကြော်သံများဖြင့် ရွာများကို လှည့်လည်ဆန္ဒထုတ်ဖော်ခဲ့သည်။
“မကြာခင်ကာလမှာ အာဏာသိမ်းမှု တစ်နှစ်ပြည့်ပါတော့မယ်။ ဒါကြောင့် အာဏာသိမ်းစက တော်လှန်ရေးအပေါ်အားစိုက်မှုမျိုး ပြန်လည်အားစိုက်ပေးကြပါ။ နည်းနာအစုံအပေါ်ပြန်လည်အားစိုက်ပေးကြပါ။ အချင်းချင်း ပိုညီညွတ်တဲ့ ညီညွတ်ရေးကို တည်ဆောက်ကြရပါမယ်။ ဒီတော်လှန်ရေးရဲ့ အဆုံးအဖြတ်ဟာ လူထုပါပဲ။ အားလုံး ပိုပြီး ညီညွတ်စွာ အဆုံးထိ တော်လှန်ကြပါစို့ဗျာ” ဟု သပိတ်ဦးဆောင်သူတို့က တိုက်တွန်းနှိုးဆော်ခဲ့သည်။
