သထုံမြို့နယ် ပန်းတိန်ရိုး-မိုးကောင်း၌ စစ်ကောင်စီယာဉ်တန်းကို ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၂)က မိုင်းဆွဲတိုက်ခိုက်ခဲ့၍ စစ်ကောင်စီတပ်မှ လေးဦးသေဆုံးပြီး လေးဦိးထက်မနည်း ဒဏ်ရာပြင်းပြင်းထန်ထန်ရရှိခဲ့ကြောင်း သထုံPDF က ထုတ်ပြန်သည်။
ယနေ့ (ဇန်နဝါရီ ၂၅ ရက်)နံနက် ၁နာရီက သွားရောက်တိုက်ခိုက်ခဲ့သည့် KNLA တပ်ဖွဲ့ဝင်များမှာ အထိအခိုက်မရှိဘဲ ပြန်လည်ဆုတ်ခွာနိုင်ခဲ့ကြောင်းလည်း သထုံ PDFက အသိပေးသည်။
မိုင်းဆွဲတိုက်ခိုက်ခံရပြီးနောက် အကြမ်းဖက်စစ်ကောင်စီတပ်မှ ၁၀မိနစ်ခန့်ကြာ ရမ်းသမ်းပစ်ခတ်မှုများပြုလုပ်ခဲ့ပြီး ကားလမ်းဘေးရှိနေအိမ်တစ်အိမ်မှ ကလေးတစ်ဦး၏ ခြေထောက်ကျည်ထိမှန်ခဲ့ကြောင်းလည်း ဒေသတွင်း သတင်းရင်းမြစ်များက ဆိုသည်။
KNU တပ်မဟာ (၁) နယ်မြေ၊ သထုံခရိုင်တွင် ဇန်နဝါရီ ၁၇ရက်ကလည်း ရန်ကုန်-မော်လမြိုင်ကားလမ်းဘေး ရွှေသံလွင်တိုးဂိတ်နားရှိ စစ်ကောင်စီတပ်စခန်းတစ်ခု တိုက်ခိုက်ခံရပြီး စစ်ကောင်စီတပ်သားတစ်ဦး ပြင်းထန်စွာ ဒဏ်ရရှိသည်။
Public Service Announcement
