လာမည့်ဖေဖော်ဝါရီလ ၁ ရက်နေ့တွင်ပြုလုပ်မည့် အသံတိတ်သပိတ်နှင့်ပတ်သက်၍ ဟုမ္မလင်းမြို့နယ် ပြည်သူ့အုပ်ချုပ်ရေးအဖွဲ့က ယနေ့ ဇန်နဝါရီလ ၃၀ ရက်နေ့တွင် ကြေညာချက်တစ်စောင်ထုတ်ပြန်ခဲ့ရာ အဆိုပါကြေညာချက်တွင် လာမည့် ဖေဖော်ဝါရီလ (၁)ရက်နေ့သည် မင်းအောင်လှိုင်နှင့်အပေါင်းအပါများက ပြည်သူ့အာဏာကို လုယူခဲ့သည့် တစ်နှစ်ပြည့်သည့်နေ့ ဖြစ်ကြောင်း၊ တစ်နည်းဆိုရသော် ပြည်သူလူထုတစ်ရပ်လုံး စိတ်နှလုံး အေးချမ်းစွာ၊ လုံခြုံစွာ မနေထိုင်ရသည်မှာ လပေါင်း (၁၂)လတိုင်အောင် ရှိပြီဟု သတိပေးနေသော နေ့လည်း ဖြစ်ကြောင်း၊ ထိုနေ့တွင် စစ်အာဏာရှင်စနစ်ဆိုးကို ဆန့်ကျင်သောအားဖြင့် မြန်မာပြည်သူလူထု တစ်ရပ်လုံးမှအသံတိတ်သပိတ်နှင့်လက်ခုပ်တီးသပိတ်အား ပြုလုပ်ကြမည် ဖြစ်ပါသည်။
သို့ဖြစ်၍ ဟုမ္မလင်းမြို့နယ်ရှိ ပြည်သူများအနေဖြင့် ဖေဖော်ဝါရီလ(၁)ရက်နေ့တွင် တစ်နိုင်ငံလုံးနှင့်အတူ ပူးပေါင်းပါဝင်နိုင်ရေးအတွက် နံနက် (၁၀)နာရီမှ ညနေ (၄)နာရီအတွင်း နေအိမ်များ၊ ဆိုင်များ ပိတ်ကြပါရန်၊ ထိုအချိန်အတွင်း လမ်းသွား၊ လမ်းလာ မပြုလုပ်ကြဘဲ တိတ်ဆိတ်ငြိမ်သက်ခြင်း အသွင်ဆောင်ကြပါရန်၊ ညနေ (၄)နာရီမှ (၄)နာရီ (၁၅)မိနစ်အတွင်း အိမ်တိုင်းမှ လက်ခုပ်တီးကြပါရန် လေးစားစွာ တိုက်တွန်းနှိုးဆော်ကြောင်း အသိပေးထားသည်။
ထိုနေ့မတိုင်မီ အကြမ်းဖက်စစ်ကောင်စီ၏ လက်အောက်ခံများမှ သပိတ်တွင်မပါဝင်နိုင်ရန် ခြိမ်းခြောက်မှုများ ရှိနိုင်သောကြောင့် အကယ်၍ ခြိမ်းခြောက်မှု ရှိခဲ့ပါက ခြိမ်းခြောက်သည့် လူပုဂ္ဂိုလ်၏ အမည်နှင့် ဌာနကို ကျွန်ုပ်တို့ ဟုမ္မလင်းမြို့နယ် ပြည်သူ့အုပ်ချုပ်ရေးအဖွဲ့သို့ ပေးပို့ကြပါရန်မေတ္တာရပ်ခံအပ်ကြောင်း၊ ထိုပုဂ္ဂိုလ်များနှင့် ၎င်း၏ အထက်အကြီးအကဲများအား မှတ်သားထားပြီး အရေးတော်ပုံ အောင်သည့်အခါ ပြင်းထန်စွာ အရေးယူမှုများ ပြုလုပ်သွားမည်ဖြစ်ကြောင်းလည်း ဟုမ္မလင်းမြို့နယ် ပြည်သူ့အုပ်ချုပ်ရေးအဖွဲ့က ကြေညာထားသည်။
အကြမ်းဖက်စစ်ကောင်စီကလည်း ဖေဖော်ဝါရီလ ၁ ရက်နေ့တွင် အသံတိတ်သပိတ်မပြုလုပ်နိုင်ရန် ပြည်သူများအား ခြိမ်းခြောက်အကျပ်ကိုင်ဖမ်းဆီးမှုများ ပြုလုပ်နေပြီး လမ်းပေါ်၌ လူရှိစေရန် တပ်မတော်ထောက်ခံပွဲများ ကျင်းပခိုင်းခြင်း၊ အစိုးရဝန်ထမ်းများအား မွန်းလွဲပိုင်းမှရုံးတက်စေခြင်း၊ စျေးဖွင့်ချိန်များတိုးမြှင့်ခြင်း၊ စက်ဘီးပြိုင်ပွဲ၊ ထမနဲထိုးပွဲများ ကျင်းပစေခြင်းတို့ဖြင့် တိတ်ဆိတ်ခြင်းသပ်တ်ကို ဖျက်ဆီးရန်စီစဥ်နေသည်။
Public Service Announcement
