မိုးဆက်တိုက်ရွာသွန်းမှုကြောင့် ထိုင်း-မြန်မာနယ်စပ် သောင်ရင်းမြစ်ကမ်းဘေးက စစ်ဘေးရှောင်တွေ အခက်ကြုံနေရပြီး အမိုးအကာမလုံလောက်လို့ မိုးရေထဲမှာအိပ်နေရတဲ့ စစ်ဘေးရှောင်တွေ အများကြီးရှိတယ်လို့ ကရင်လူ့အခွင့်အရေးအဖွဲ့(KHRG)ပြောခွင့်ရသူ စောနန္ဒဆူးထံကနေ သိရပါတယ်။
အခုရက်ပိုင်းထဲ မိုးဆက်တိုက်ရွာသွန်းမှုတွေကြောင့် သောင်းရင်းမြစ်ကမ်းနံဘေးမှာရှိတဲ့ စစ်ရှောင်စခန်းအတွင်းက ယာယီတဲတွေပျက်စီးခဲ့ကာ ဆန်နဲ့အစားအသောက်တွေလည်း ရေစိုပျက်စီးမှုတွေရှိခဲ့တယ်လို့ သိရပါတယ်။
“ရာသီဥတုကလည်းဖောက်ပြန်နေတော့ သနားဖို့ကောင်းတယ်။ သူတို့လည်းတော်တော်ဒုက္ခရောက်နေကြတယ်။ အခု ရေကြီးတာရော မိုးရွာလို့အမိုးအကာမလုံလို့ မိုးရေထဲမှာအိပ်နေရတဲ့လူ တညလုံးဒုက္ခခံနေရတဲ့ စစ်ရှောင်တွေကတော့ အများကြီးပဲ” လို့ ကရင်လူ့အခွင့်အရေးအဖွဲ့က ပြောခွင့်ရသူ စောနန္ဒဆူးက ပြောပါတယ်။
ဒါ့အပြင် ရာသီဥတုအေးတာတွေကြောင့် စစ်ရှောင်စခန်းအတွင်းက ကလေးငယ်တချို့လည်း ဖျားနာတာတွေရှိနေပြီး နေရာထိုင်ခင်း၊ အမိုးအကာ၊ ဝါး စတဲ့အသုံးအဆောင်ပစ္စည်းတွေ လိုအပ်ချက်ရှိနေတယ်လို့ သိရပါတယ်။
Public Service Announcement
လေးကေကော်တိုက်ပွဲကြောင့် ၁ လကျော်ကြာ တိမ်းရှောင်နေခဲ့ရတဲ့ စစ်ဘေးရှောင်တွေဟာ ဒီကနေ့အချိန်ထိ နေရပ်မပြန်နိုင်သေးပဲ သောင်ရင်းမြစ်ကမ်းတလျှောက်နဲ့ အခြားနီးစပ်ရာကျေးရွာတွေထဲမှာ လိုက်လံတိမ်းရှောင်နေထိုင်ခဲ့ရပြီး အကူအညီလိုအပ်ချက်တွေ အများကြီးရှိနေတယ်လို့ စစ်ရှောင်အရေး ကူညီပေးနေသူတွေထံကနေ သိရပါတယ်။
