ဒီပဲယင်းမြို့နယ်တော်လှန်ရေးသပိတ်စစ်ကြောင်းဦးဆောင်ကော်မတီ အဖွဲ့ဝင်၏ နေအိမ်ကို အကြမ်းဖက် စစ်ကောင်စီကချိတ်ပိတ်လိုက်ပြီး လူထုသပိတ်ကို အကြောက်လွန်နေသလားဟု အိမ်ရှင်ကိုနဂါးက စစ်ကောင်စီအား မေးခွန်းထုတ်လိုက်သည်။
ဒီပဲယင်းမြို့နယ်မှ ကိုနဂါးဟု လူသိများသော ကိုသူရအောင်၏ နေအိမ်ကို အကြမ်းဖက် စစ်ကောင်စီက ဖေဖော်ဝါရီ ၈ ရက် နံနက်တွင် ချိတ်ပိတ်ခဲ့ခြင်းဖြစ်သည်။ သို့သော် ကိုနဂါးဦးဆောင်သော လူထုသပိတ်သည် ယင်းနေ့ နေ့လည်နှင့် ညနေတွင် ထပ်မံ၍ စစ်အာဏာရှင်ဆန့်ကျင်ရေး သပိတ်စစ်ကြောင်း ထွက်လာခဲ့သည်ဟု ဒေသခံများက ပြောသည်။
နေအိမ်ချိတ်ပိတ်ခံရသည်ကို လုံးဝစိတ်မဝင်စားဘဲ ပြည်သူ့တော်လှန်ရေး အောင်မြင်ဖို့သည်သာ အရေးကြီးသည်ဟု အိမ်ရှင်ကိုနဂါးက လူမှုကွန်ရက်တွင် ရေးသားထားသည်။
“မနက်ပိုင်း ကျနော့်အိမ် ချိတ်ပိတ်ခံရတယ်။နေ့လည်ပိုင်းနဲ့ညနေပိုင်း ကျနော်သပိတ်စစ်ကြောင်းထွက်တယ်။သမိုင်းပေးတာဝန်ကိုကျေပွန်ဖို့ကလွဲ ကျန်တာခေါင်းထဲမရှိ”ဟု ကိုနဂါးကရေးသားထားသည်။
Public Service Announcement
ထို့ပြင် ” သပိတ်ကိုအဲလောက်ကြောက်လားစကစ။ငြိမ်းချမ်းစွာဆန္ဒပြ တာတောင် အဲ့လောက်ကြောက်နေရင် ပြည်သူ့ကာကွယ်ရေးဘက်ကို ဘယ်လောက်ကြောက်နေပြီဆိုတာသိပ်သိသာနေပြီ” ဟုဆက်ပြောထားသည်။
ဒီပဲယင်းမြို့သည် စစ်အာဏာရှင်အား လက်နက်ကိုင်တော်လှန်ရေးရော လူထုသပိတ်ပါ အလွန်အားကောင်းသည့် မြို့ဖြစ်သည်။လူထုသပိတ်များကို ပြည်သူ့ကာကွယ်ရေးအဖွဲ့များက လုံခြုံရေးယူပေးကာ စစ်အာဏာရှင်ပြုတ်ကျရေးအတွက်နေစဥ်ဆန္ဒထုတ်ဖော်နေကြသည်။
