ပဲခူးတိုင်း၊ တောင်ငူမြို့နယ်အတွင်း ရန်ကုန်-မန္တလေးအမြန်လမ်းမကြီးတွင် အကြမ်းဖက်စစ်ကောင်စီယာဥ်တန်းအား ပဒေသာမိုင်းဖြင့် ဖောက်ခွဲ တိုက်ခိုက်ခဲ့ရာ အကြမ်းဖက်စစ်ကောင်စီတပ်သားများ ထိခိုက်မှုရှိနိုင်ကြောင်း တောင်ငူပြည်သူ့ကာကွယ်ရေးအဖွဲ့ LPDF-TGOက အသိပေးသည်။
ယနေ့ (ဖေဖော်ဝါရီလ ၁၀ ရက်) နံနက် ၁၁ နာရီအချိန်က တောင်ငူမြို့နယ်၊ ရန်ကုန်-မန္တလေး အမြန်လမ်း မိုင်တိုင်တစ်ခုတွင် အကြမ်းဖက်စစ်ကောင်စီ ယာဉ်တန်းအား ရှေ့ထွက် ပဒေသာမိုင်း ၅ လုံးဆွဲဖြင့် ဖောက်ခွဲတိုက်ခိုက် ခဲ့ကြောင်း၊ သို့သော် ပြည်သူ၏ ကုန်ကားတစ်စီးကပ်ပါလာ၍ ငဲ့ညှာလိုက်ရာ သတ်ကွင်းကျော်မှခွဲလိုက်ရသည့်အတွက် ပဒေသာမိုင်း ၅ လုံးထဲမှ အစွန်တစ်လုံး စစ်ကား အနောက်တည့်တည့် ထိခိုက်သွားကြောင်း LPDF-TGOက အသိပေးသည်။
“မနက် ဆယ်နာရီလောက်က အမြန်လမ်းမိုင်တိုင် ၁၅၀ မှာ ပဒေသာ ၆ လုံးတော့ ဆွဲလိုက်တယ်။ကားတွေတော့မမှောက်ဘူး။နောက်ထိုင်စီးတဲ့ စခ တွေတော့ ထိလိမ့်မယ်။မီးခိုးအူအောင်မောင်းပြီး ပြေးကြတယ်။”ဟု တောင်ငူပြည်သူ့ကာကွယ်ရေးအဖွဲ့တာဝန်ရှိသူကပြောကြားသည်။
ရဲဘော်များအထိအခိုက်မရှိ ဆုတ်ခွာနိုင်ခဲ့ပြီး အကြမ်းဖက် စစ်ကောင်စီ တပ်ကားများနှင့် အနီးကပ်လိုက်ပါခြင်းမပြုရန် တောင်ငူပြည်သူ့ ကာကွယ်ရေးအဖွဲ့က သတိပေးထားသည်။