ကလေးမြို့တောင်ပိုင်း၊ ရန်ကြီးအောင် ကျေးရွာတွင် တပ်စွဲထားသည့် အကြမ်းဖက်စစ်ကောင်စီတပ်များကို ဒေသခံကာကွယ်ရေးနှစ်ဖွဲ့က ယမန့်နေ့နံနက်ပိုင်းက ပူးပေါင်းတိုက်ခိုက်ခဲ့ကြောင်း ချင်းပြည်ကာကွယ်ရေးတပ်-ကလေး-ကဘော်-ဂန့်ဂေါ( CDF- KKG)က ယနေ့
(ဖေဖော်ဝါရီ၁၃) ထုတ်ပြန်သည်။
အကြမ်းဖက်စစ်ကောင်စီနှင့် ဒေသခံကာကွယ်ရေးတပ်တို့ကြားလက်နက်ကြီးဖြင့် အပြန်အလှန်ပစ်ခတ်ခဲ့ပြီး တိုက်ပွဲမှာ ဖေဖော်ဝါရီ ၁၂ရက် နံနက် ၁နာရီမှ စတင်ပြီး နှစ်နာရီကြာမြင့်ခဲ့ကြောင်းထုတ်ပြန်ချက်တွင်ဖော်ပြထားသည်။
“ဒီဘက်မှာ စစ်ကောင်စီတပ်တွေ စခန်းချထားတာကြာပါပြီ။ ဒါကို ကျွန်တော် နှစ်ဖွဲ့ကဝင်တိုက်တာပါ”ဟု CDF-KKG၏ ပြန်ကြားရေးတာဝန်ခံက ပြောသည်။
တိုက်ပွဲအတွင်း အကြမ်းဖက်စစ်ကောင်စီတပ်၏ အဆောက်အဦးများပျက်စီးပြီး ၎င်းတို့တပ်ဖွဲ့ဝင်များ ဒဏ်ရာရရှိမူများရှိကြောင်း CDF-KKGက ထုတ်ပြန်ထားသည်။ဒေသခံကာကွယ်ရေးတပ်များဖက်မှ ထိခိုက်မူမရှိဘဲ ပြန်လည်ဆုတ်ခွာနိုင်ခဲ့သည်ဟုလည်းပါရှိသည်။
ထိုတိုက်ပွဲကို ကလေး-ကဘော်-ဂန့်ဂေါအခြေစိုက် CDF(KKG)တပ်မှ တပ်ရင်း၂ နှင့် တပ်ရင်း-၃ နှင့် ရိန်းဂျား ကလေးမြို့ပြည်သူ့ကာကွယ်ရေးတပ်ဖွဲ့ (RKDF)တို့က ပူးပေါင်းတိုက်ခိုက်ခဲ့ခြင်းဖြစ်သည်။
အကြမ်းဖက်စစ်ကောင်စီတပ်သည် ဖေဖော်ဝါရီ ၆ ရက်ကတည်းက CDF-KKG တပ်ရင်း ၄ စခန်းကို တိုက်ခိုက်ရန် စစ်ကြောင်း ငါးကြောင်းဖြင့် ထိုးစစ်ဆင်ခဲ့ခြင်းဖြစ်သည်။