အကြမ်းဖက်စစ်ကောင်စီတပ်များ မိုးဗြဲမြို့၌ ဝင်ရောက်နေရာယူလာ၍ ပြည်သူများအနေဖြင့် လုံခြုံသည့် နေရာများသို့ ရွှေ့ပြောင်းပေးကြရန် မိုးဗြဲပြည်သူ့ကာကွယ်ရေးတပ်ဖွဲ့(PDF)က ယနေ့ ထုတ်ပြန်သည်။
“စစ်ကောင်စီဘက်က မနေ့က မိုးဗြဲကို အင်အားအလုံးအရင်း နဲ့ ဝင်လာတယ်။ တင့်ကားတွေလည်းပါတယ်။ ဝင်လာပြီးနေရာတွေယူတယ်။ အဝင်လမ်းတွေကို ကင်းပုန်းတွေချတယ်။ အဲဒီလို မျိုး မြို့ထဲကို ဝင်ထိုင်တာမျိုး လက်မခံဘူး။စစ်ရေးတင်းမာလာတယ်လို့ပဲ ပြောရမှာပေါ့”ဟု PDF ပြောရေးဆိုခွင့်ရှိသူက ပြောသည်။
ယနေ့ နံနက်ပိုင်းတွင် လက်နက်ကြီး၊ လက်နက်ငယ် ပစ်ခတ်မှုအချို့ရှိခဲ့ကြောင်း၊ စစ်ရေးအခြေအနေကြောင့် လူထုများဘေးကင်းစေရေး ယခုကဲ့သို့ အသိပေးချက် ထုတ်ပြန်ရခြင်းဖြစ်ကြောင်း ၎င်းက ဆိုသည်။
မိုးဗြဲPDF၏ ထုတ်ပြန်ချက်တွင် လုံခြုံသည့် နေရာများသို့ ရွှေ့ပြောင်းပေးရန်၊ ဘေးကင်းခိုင်မာသည့် နေရာကို ရွေးချယ်ပြီးနေထိုင်ကြရန်နှင့် ယင်းသို့ နေထိုင်ရန် အခက်အခဲရှိပါက ဘုန်းကြီး ကျောင်းများသို့ ရွှေ့ပြောင်းနေထိုင်ကြရန် ဖော်ပြထားသည်။
Public Service Announcement
“ပထမ ဦးစားပေးကတော့ ပြည်သူတွေ ဘေးကင်းဖို့ အထိအခိုက် မရှိစေဖို့ရယ်။ အဲဒါကို ပထမ ဦးစားပေးအနေနဲ့ ကျွန်တော်တို့ စဉ်းစားတယ်။ စဉ်းစားတဲ့အပေါ် ပြည်သူတွေအနေနဲ့ ပူးပေါင်းဆောင်ရွက်ဖို့လိုတယ်။ သတိနဲ့ ယှဉ်တွဲပြီး ဂရုစိုက်နေထိုင်ဖို့ပေါ့”ဟု PDF ပြောရေးဆိုခွင့်ရှိသူက ပြောသည်။
