● လေယာဥ်များပျက်စီးမှုကို စစ်ကောင်စီကက(လေ)စစ်ဦးစီးဌာနကမေးမြန်းရာ ဖြေကြားပေးသော လေတပ်ဗိုလ်ကြီးကြောက်လန့်၍ အချက်အလက်များကို ဖုံးကွယ်၊ ထိန်းပြောရန် ကြိုးစား
ရန်ကုန်မြို့ မှော်ဘီမြို့နယ်ရှိ စစ်ကောင်စီလေတပ်ဌာနချုပ်မှ Fighter ဂျက်လေယာဥ်များကို People’s Force တပ်သားများက ဝင်ရောက်ဗုံးဆင် တိုက်ခိုက်ရာ Fighter ဂျက်လေယာဥ်နှစ်စီး ထိခိုက်ပျက်စီးသွားကြောင်း တိုက်ခိုက်ခဲ့သောအဖွဲ့က ပြောသည်။
တိုင်းရင်းသားဒေသများသို့ ဗုံးကျဲတိုက်ခိုက်နေသော Fighter ဂျက်လေယာဥ်များထားရှိသောနေရာသို့ People’s Force တပ်သားများက ဝင်ရောက်ကာ လေယာဥ်များကိုဗုံးများဆင်ပြီး ယမန်နေ့ည ၁၁ နာရီ ၄၀ မိနစ်တွင် အဝေးမှခလုတ်နှိပ်ဖောက်ခွဲတိုက်ခိုက်ခဲ့ခြင်းဖြစ်ကြောင်း People’s Force အဖွဲ့က ထုတ်ပြန်သည်။
Fighter ဂျက်လေယာဥ်တစ်စီးမှာ ပေါက်ကွဲသွားပြီး ကျန်လေယာဥ် တစ်စီးမှာလည်းဗုံးစများစင်၍ ရေဒါစနစ် ထိ့ခိုက်ပျက်စီးသွားကြောင်းသိရသည်။ ပျက်စီးထိခိုက်သွားသောတိုက်လေယာဥ် နှစ်စီး နံပတ်များမှာ ၁၈၀၂ ၊၁၈၀၃ ဖြစ်ကြောင်းလည်း သိရသည်။
Public Service Announcement
လေယာဥ်များတိုက်ခိုက်ခံရပြီးနောက် ရန်ကုန်လေတပ်ဌာနချုပ်မှ တာဝန်ကျ ဗိုလ်ကြီးတစ်ဦးကို ကက(လေ) စစ်ဦးစီးဌာနက လေယာဥ်ပျက်စီးမှု ဒေါသတကြီးမေးမြန်နေသော အသံဖိုင်လည်း ပေါက်ကြားလာသည်။
လေယာဥ်ပျက်စီးမှုနှင့်ပေါက်ကွဲမှုအခြေအနေကို မေးမြန်းရာ ဖြေကြားနေသော စစ်ကောင်စီ တပ်မှ ဗိုလ်ကြီးကလေယာဥ်ပေါ်တွင် ဖုန်းတင်၍ အချိန်ကိုက်မိုင်းဖြင့်ဖောက်ခွဲတိုက်ခိုက် သွားခြင်းဖြစ်ပြီး ပျက်စီးဆုံးရှုံးမှုမေးမြန်းရာတွင် ထိတ်လန့်နေကာ ဖြစ်စဥ်ကို ဖုန်းကွယ်လျောပေါ့ပြောရန်ကြိုးစားနေသည်ကိုလည်း အသံဖိုင်တွင်ကြားရသည်။
“ဟေကောင်မင်းတို့လုပ်နေတာကြာနေပြီ မြန်မြန်လုပ်စမ်း”ဟု စစ်ဦးစီးဌာနမှ အရာရှိက ဖြေကြားပေးနေသော ဗိုလ်ကြီးကို ဒေါသတကြီးအော်ဟစ်နေသည်ကိုလည်း ကြားရသည်။
ဖောက်ခွဲတိုက်ခိုက်ခံရသော လေယာဥ်သည် ရုရှားနိုင်ငံထုတ် YAK 130 တိုက်ခိုက်ရေးလေယာဥ်များဖြစ်ပြီး ၂၀၁၆တွင် ရုရှားမှ ၆ စီးကို စာချုပ်ချုပ် ဝယ်ယူခဲ့သည်။ ၂၀၁၈တွင် ရုရှားမှရောက်ရှိလာပြီး အာဏာသိမ်းခေါင်းဆောင်မင်းအောင်လှိုင်က ထိုလေယာဥ်များကို သပြေခက်ဖြင့်ပက်၍တပ်တော်ဝင်ခဲ့သည်။ ရုရှားမှ Yakovlov Design Bureau မှ ထုတ်လုပ်သော YAK -130 ဖိုက်တာဂျက်လေယာဥ်များသည်တစ်စီးလျှင် အမေရိကန် ဒေါ်လာ ၁၅ သန်းဈေးရှိသည်။
စစ်ကောင်စီတပ်သည် တိုင်းရင်းသားလက်နက်ကိုင်အဖွဲ့များ ၊PDF များနှင့် တိုက်ခိုက်ပြီး ၎င်းတို့အထိနာပါက တိုက်လေယာဥ်များ ၊ရဟတ်ယာဥ်များ အသုံးပြု၍ အရပ်သားပြည်သူများရှိသောနေရာများကိုပါမရှောင် ပစ်ခတ် တိုက်ခိုက်ခြင်း ၊ဗုံးကြဲခြင်းများပြုလုပ်နေသည်။
ကရင်နီပြည်နယ် ၊ကရင်ပြည်နယ်၊ချင်းပြည်နယ်၊ ကချင်ပြည်နယ် ၊စစ်ကိုင်းတိုင်း ၊ မကွေးတိုင်း၊ စသောဒေသများမှ တိုင်းရင်းသားပြည်သူများမှာ စစ်ကောင်စီတပ်၏ လေကြောင်းမှ တိုက်ခိုက်မှုကို မကြာခဏခံနေရသည်။
