စစ်ကိုင်းတိုင်း၊ ယင်းမာပင်မြို့နယ်တွင် အနောက်မြောက်တိုင်းစစ်ဌာနချုပ်(နမခ) နယ်မြေအတွင်းရှိ ချင်းတွင်းမြစ်ထဲ၌ ကျောက်ချရပ်နားထားသော ရေယာဥ်ပေါ်မှ အကြမ်းဖက်စစ်ကောင်စီ၏ ကျောက်မီးသွေးများအား မီးရှို့ဖျက်ဆီးခဲ့ကြောင်းအမိမြေတော်လှန်ရေးတပ်ဖွဲ့က သတင်းထုတ်ပြန်
သည်။
ဖေဖော်ဝါရီလ ၂၄ ရက် ည ၈ နာရီအချိန်က “ချိုမိုင်မိုင်” ယင်းမာပင်-ကနီ မဟာမိတ်တပ်ပေါင်းစုနှင့်အတူ “အမိမြေ” တော်လှန်ရေးတပ်ဖွဲ့တို့ပူးပေါင်း၍ အနောက်မြောက်တိုင်းစစ်ဌာနချုပ်(နမခ) နယ်မြေအတွင်းရှိ ချင်းတွင်းမြစ်ထဲတွင် ကျောက်ချရပ်နားထားသော အကြမ်းဖက်စစ်ကောင်စီတပ်၏ ပင်မစီးပွားရေး အရင်းအမြစ်ထောက်တိုက်ဖြစ်သည့် မြန်မာ့စီးပွားရေးဦးပိုင်ကုမ္ပဏီလီမိတက် ရတနာစိန်မင်းဖလက်ခွင်နှင့် ကျောက်မီးသွေး (၁၈၀၀) မက်ထရစ်တန်အား မီးရှို့ဖျက်ဆီးခဲ့ကြောင်း အမိမြေတော်လှန်ရေးတပ်ဖွဲ့က ယမန်နေ့( ဖေဖော်ဝါရီလ ၂၅ ရက်နေ့)တွင် အသိပေးသည်။
ကျောက်မီးသွေးဖလက်ခွင်ပေါ်တွင်ပါလာသော တာဝန်ခံနှင့်အခြားအလုပ်သမားများကိုလည်း ဆက်လက်၍ စစ်ကောင်စီ၏ စီးပွားရေးအကျိုးအမြတ်နှင့်သက်ဆိုင်သော အလုပ်များကိုမလုပ်ကြရန် သတိပေးတားမြစ်ခဲ့ပြီး အေးအေးချမ်းချမ်း ပြန်လွှတ်ပေးခဲ့ကြောင်းလည်း အမိမြေတော်လှန်ရေးတပ်ဖွဲ့က ပြောသည်။
ချင်းတွင်းမြစ်ရိုးတစ်လျှောက် မုံရွာမြို့နယ်မှစတင်၍ယင်းမာပင်၊ ကနီ၊ မင်းကင်း နယ်များအထိ အကြမ်းဖက်စစ်ကောင်စီတပ်အား ရေကြောင်းနှင့်ကုန်းကြောင်းများကပါ ဒေသခံပြည်သူ့ကာကွယ်ရေးတပ်ဖွဲ့များကခုခံတော်လှန်တိုက်ခိုက်နေကြသည်။
Public Service Announcement
