စစ်ကိုင်းတိုင်း ယင်းမာပင်မြို့နယ်ရှိ သပြေအေးကျေးရွာကို အကြမ်းဖက်စစ်ကောင်စီတပ်က ယနေ့ ထပ်မံမီးရှို့၍ ဘုန်းကြီးကျောင်းအပါအဝင် နေအိမ်အများအပြား မီးလောင်ခဲ့ကြောင်း ယင်းမာပင်နယ်ခံက ပြောသည်။
အကြမ်းဖက်စစ်ကောင်စီတပ်သည် မကြာသေးမီရက်ပိုင်းအတွင်းက ယင်းမာပင်မြို့နယ် ချင်းပုန်းရွာကို ရဟတ်ယာဉ်များဖြင့် ဝင်ရောက်စီးနင်းတိုက်ခိုက်ပြီး နေအိမ်၊ ကား၊ ဆိုင်ကယ် စသည့် ပြည်သူလူထုပိုင် ပစ္စည်းများကို မီးရှို့ကာ ဒေသခံ ၉ဦးထက်မနည်းကို သတ်ဖြတ်ခဲ့သည်ဟု ယင်းမာပင်နယ်ခံက ပြောသည်။
ယနေ့တွင် ချင်းပုန်းနှင့် ၅ မိုင်ခန့် အကွာရှိသော သပြေအေးရွာသို့လည်း ရဟတ်ယာဉ်ဖြင့် စစ်ကောင်စီတပ်သားများချကာ ရွာကို မီးရှို့ဖျက်ဆီးခြင်း ဖြစ်သည်ဟု ဒေသခံ အမျိုးသမီးတစ်ဦးက ပြောသည်။
“အဲဒီမှာ သူတို့ မီးရှို့တာက ဘုန်းကြီးကျောင်းရော အကုန်လုံးလောင်သွားတယ်ပြောတယ်။ ချင်းပုန်းက တစ်ဖွဲ့သီးသန့်၊ သပြေအေးက သီးသန့်၊ ရဟတ်ယာဉ်နဲ့ ဝဲပြီးချထားပြီးတော့ စီးနင်းတာနဲ့တူတယ်။ အခု သပြေအေးလည်း သူတို့ နေရာဝင်ယူသွားတာ”ဟု ၎င်းက ဆိုသည်။
သပြေအေးရွာ ဖြစ်စဉ်တွင် အရပ်သားသေဆုံးမှု အခြေအနေကို မကြားသိရသေးဘဲ စစ်ကောင်စီတပ်များ ဝင်ရောက်လာ၍ ရွာသူရွာသားများ ထွက်ပြေးတိမ်းရှောင်နေကြရသည်ဟု ဒေသခံက ပြောသည်။
“နယ်မြေအခြေအနေက စစ်ခွေးတွေ ဒီလိုမျိုး ဒုက္ခပေးနေတော့ ပြည်သူတွေက ပတ်ပြေးနေရတယ်။ အခုဆိုရင် သပြေအေးပတ်ဝန်းကျင်က အိုးဘိုတို့၊ ကျောက်ပြုတ်တို့ အကုန်လုံး ထွက်ပြေးကုန်ကြရတာ”ဟု ၎င်းက ဆိုသည်။