ခရမ်းမြို့နယ်နှင့် သုံးခွမြို့နယ်တို့တွင် ယနေ့ (ဖေဖော်ဝါရီ ၂၈)ညနေပိုင်းတွင် စစ်ကောင်စီတပ်ကို မိုင်းခွဲတိုက်ခိုက်မှုများရှိခဲ့ကြောင်း ဒေသခံများက ပြောသည်။
တိုက်ခိုက်မှုဖြစ်ပွားသည့်နေရာများမှာ ခရမ်းမြို့နယ်တွင် ပိန်းကန်ကျေးရွာရဲစခန်း၊ တမံကြီးကျေးရွာနှင့် ကျုံးတူးကျေးရွာအနီးတိုက်ခိုက်မှုများဖြစ်ပွားခဲ့ပြီး သုံးခွမြို့နယ်တွင် ကျောင်းစုပတုပ်ကျေးရွာတောင်ဘက်နားတွင် ဖြစ်ပွားခဲ့ခြင်း ဖြစ်သည်။မည်သည့်အဖွဲ့က တိုက်ခိုက်သည်ကိုမူမသိ့ရသေးပေ။
ယနေ့ညနေ ၃ နာရီခန့်တွင် ပိန်းကန်ရဲစခန်းတွင် အပြန်အလှန်ပစ်ခတ်မှုဖြစ်ပွားခဲ့ရာ အဆိုပါစခန်းသို့ တပ်ကူလာသည့်စစ်ကားတစ်စီးသည် တမံကြီးကျေးရွာအနီးတွင် မိုင်းခွဲတိုက်ခိုက်ခံခဲ့ရကြောင်း ဒေသသတင်းရင်းမြစ် Khayan Channal က ဖော်ပြသည်။
အလားတူ ခရမ်းမြို့နယ် ကျုံးတူးကျေးရွာအနီးတွင်လည်း ယနေ့ညနေ ၄ နာရီခန့်က စစ်ကားတစ်စီး မိုင်းခွဲခံရပြီး ကားမှာပျက်စီးသွားကြောင်း သိရသည်။
သုံးခွမြို့နယ်အတွင်း တိုက်ခိုက်မှုဖြစ်စဥ်မှာ ယနေ့ညနေ ၄ နာရီ ၅၀ ခန့်က ကျောင်းစုပတုပ်ကျေးရွာအနီးတွင် စစ်ကားတစ်စီးမိုင်းခွဲခံရကြောင်း ဒေသခံများက ပြောသည်။
အထက်ပါတိုက်ခိုက်မှုဖြစ်စဥ်များတွင် ထိခိုက်သေဆုံးမှုအခြေအနေများကို စုံစမ်းနေဆဲဖြစ်ပြီး အရေအတွက် မသိရသေးပေ။