အာဏာသိမ်းပြီးနောက် စစ်​​ကောင်စီတပ်ကနေရာပေါင်း ၁၈၀ကျော်မှ အိမ်ခြေ၆,၇၀၀ကျော် မီးရှို့ဖျက်ဆီး

▪️အိမ်ခြေ ၄,၅၀၀ ကျော်မှာ ယခုနှစ်အတွင်း မီးရှို့ခံရခြင်းဖြစ်

အကြမ်းဖက်စစ်ကောင်စီတပ် အာဏာသိမ်းပြီးနောက်ပိုင်း နေရာပေါင်း ၁၈၆နေရာမှ လူနေအိမ်ခြေ ၆,၇၁၉ လုံးကို စစ်ကောင်စီတပ်နှင့် လက်အောက်ခံ အဖွဲ့အစည်းများက မီးရှို့ ဖျက်ဆီးခဲ့ကြောင်း Data For Myanmar က ယနေ့ ထုတ်ပြန်သည်။

၂၀၂၁ ဖေဖော်ဝါရီ ၁ရက်မှ ယခုနှစ် မတ်လ ၇ရက်အထိ စစ်ကောင်စီတပ်နှင့် လက်အောက်ခံအဖွဲ့အစည်းများက မီးရှို့၍ ပျက်စီးသွားတဲ့ လူနေအိမ် စုစုပေါင်း အခြေအနေများကို ခန့်မှန်းဖော်ပြခဲ့ခြင်းဖြစ်သည်။

ထိုသို့ ထုတ်ပြန်ရာတွင် သတင်းမီဒီယာများ၌ ဖော်ပြခဲ့သည့် တိုက်ပွဲသတင်းများနှင့် နေအိမ်မီးရှို့ခံရသည့် သတင်းများကို စိစစ်ထားခြင်းဖြစ်ကြောင်း၊ ဒေသခံ လူအခွင့်အရေးအဖွဲ့များနှင့် စစ်ဘေးရှောင်များကို ကူညီပေးနေသည့် အဖွဲ့များက ထုတ်ပြန်သည့် စာရင်းများကိုလည်း အခြေခံထားကြောင်း ဖော်ပြထားသည်။ မပြည့်စုံသည့် အချက်အလက်များ ချန်ထားခဲ့ရ၍ မြေပြင်တွင် စစ်ကောင်စီတပ်နှင့် လက်အောက်ခံ အဖွဲ့များက မီးရှို့သည့် အိမ်အရေအတွက် ယခုစာရင်းထက် ပိုများနိုင် သည်ဟု ဆိုသည်။

Public Service Announcement

Data For Myanmar ကထုတ်ပြန်သည့် စာရင်းများအရ စစ်ကောင်စီတပ်က မီးရှို့၍ စစ်ကိုင်းတိုင်းတွင် အိမ်ခြေ ၄,၀၀၀ နီးပါး၊ မကွေးတိုင်းတွင် အိမ်ခြေ ၁,၁၀၀ ကျော်၊ ချင်းပြည်နယ်တွင် အိမ်ခြေ ၁,၁၀၀ ကျော်၊ ကယားပြည်နယ်တွင် အိမ်ခြေ ၃၁၀ကျော်၊ ရှမ်းပြည်နယ်တွင် အိမ်ခြေ ၉၀ကျော်နှင့် မန္တလေး၊ ပဲခူး၊ တနင်္သလာရီ၊ ကရင်နှင့် ကချင်ဒေသများရှိ ပြည်သူလူထု နေအိမ်များလည်း မီးလောင်ပျက်စီးခဲ့ရသည်။

ထိုသို့ မီးရှို့ဖျက်ဆီးရာ၌ ယခုနှစ် ဖေဖော်ဝါရီအတွင်း အများဆုံးဖြစ်ပြီး ယင်းတစ်လတည်း၌ အိမ်ခြေ သုံးထောင်နီးပါး မီးရှို့ဖျက်ဆီးခံခဲ့ရသည်ဟုဆိုသည်။ စစ်ကောင်စီတပ် မီးရှို့ဖျက်ဆီးခဲ့သည့် အိမ်ခြေ စုစုပေါင်း ၆၇၀၀ ကျော်အနက် ယခု နှစ် ဇန်နဝါရီမှ မတ်လ ၇ရက်နေ့အထိ ရက်ပေါင်း ၆၀ကျော်အတွင်း အိမ်ခြေ ၄,၅၀၀ ကျော်မီးလောင်ပျက်ဆီးခဲ့ရသည်။

ထို့ကြောင့် စစ်ကောင်စီတပ်သည် ယခုနှစ်ဆန်းပိုင်းမှစ၍ ကျေးရွာများကို ပစ်မှတ်ထား မီးရှို့ဖျက်ဆီးမှုများ တိုး၍ ပြုလုပ်လာသည်ကို တွေ့ရသည်။