မီးရထားအလုပ်ရုံတွေ တည်ရှိတာကြောင့် လူသိများတဲ့ မန္တလေးတိုင်း ၊မြစ်ငယ်မြို့က ရပ်ကွက်အချို့ ကို ကျုးကျော်လိုသတ်မှတ်ကာ စစ်ကောင်စီက နေအိမ်တွေ ၊လိုင်းခန်းတွေကို ဖျက်ပြီး ပြောင်းရွှေ့ခိုင်းနေပါတယ်။
မြစ်ငယ်မှာ CDM ပြုလုပ်ထားတဲ့ မီးရထားဝန်ထမ်း အများအပြား နေထိုင်ကြသလို အဲဒီဝန်ထမ်းတွေကိုလည်း ဝန်ထမ်းလိုင်းခန်းကနေ ရက်ပိုင်းအတွင်း အပြီး ပြောင်းရွှေ့ခိုင်းထားတယ်လို့သိရပါတယ်။
မတ်လ ၅ ရက်နေ့ကတော့ မြစ်ငယ်ကို စစ်ကောင်စီတပ်တွေပိတ်ဆို့လိုက်ကာ CDM လုပ်ထားတဲ့ဝန်ထမ်းတွေကို လိုင်းခန်းကနေ ထွက်ခွာဖို့ သတိပေးစာ ကပ်တာ ၊ ခြိမ်းခြောက်တာတွေလုပ်ခဲ့တာရှိပါတယ်။
“ အခုတော့ ပစ္စည်းတွေသယ်နေပြီ၊ ကျွန်တော်ကတော့ မိဘတွေအိမ်ပြန်နေရတော့မှာပေါ့၊ တခြားသူတွေကတော့ ဈေးသက်သာတဲ့နေရာမှာ အိမ်ငှားအဖြစ်နဲ့ငှားနေကြမှာ” လို့ CDM မီးရထားဝန်ထမ်းတစ်ဦးက မတ်လ. ၉ ရက်မှာ လူထုနွေဦးသတင်းဌာနကို အခြေအနေပြောပြပါတယ်။
Public Service Announcement
တချိန်တည်းမှာပဲ မြို့ပေါ်က လူနေရပ်ကွက် ကြီး ၇ ခုလောက်က နေအိမ်တွေကို ကျုးကျော်အဖြစ်သတ်မှတ်ကာ ဘူဒိုဇာတွေသုံးပြီး စစ်ကောင်စီက ဖယ်ရှားရှင်းလင်းတာတွေလုပ်နေတယ်လို့ဒေသခံတွေကပြောပါတယ်။
လူနေအိမ်တွေကို ဖယ်ရှားတာဟာ လမ်းမြေဧရိယာမှာ နေထိုင်တာ ၊ခွင့်ပြုချက်မရှိဘဲနေထိုင်တာ ၊မြေဂရန် ချပေးချိန်က စီမံကိန်းဧရိယာထဲ ရောက်သွားရင် ဖယ်ရှားပေးမယ်ဆိုတဲ့ အချက်တွေကြောင့်လို့ စစ်ကောင်စီကဘက်ကအကြောင်းပြထားပါတယ်။
ဒါပေမယ့် ဒီလို ဖယ်ရှားခံရတဲ့ရပ်ကွက်အချို့ဟာ CDM လုပ်ထားတဲ့ဝန်ထမ်းမိသားစုတွေ နေထိုင်နေတဲ့ ရပ်ကွက်တွေလည်းပါဝင်တယ်လို့သိရပါတယ်။
မြစ်ငယ်မြို့ဟာ မန္တလေးခရိုင်အတွင်းမှာ တည်ရှိပြီး မန္တလေးမြို့ကနေ ၉ မိုင်ခန့်ကွာဝေးကာ မြန်မာနိုင်ငံအတွက် အရေးပါတဲ့ မြို့တစ်မြို့လည်းဖြစ်ပါတယ်။
မီးရထားအလုပ်ရုံတွေ ရှိတာကြောင့် မြစ်ငယ်မြို့ဟာ မီးရထားဝန်ထမ်းတွေအဓိက နေထိုင်ရာမြို့လည်းဖြစ်ပါတယ်။
