လတ်တလောတိုက်ပွဲများပြင်းထန်နေသည့် ကရင်နီ(ကယား)ပြည်နယ် လွိုင်ကော် – ဒီးမော့ဆို လမ်းပိုင်းကို အကန့်အသတ်မရှိ ပိတ်ထားကြောင်း ကရင်နီအမျိုးသားများကာကွယ်ရေးတပ်(KNDF) တပ်ရင်း(၉)က ယနေ့ နေ့လည်ပိုင်း၌ ထုတ်ပြန်သည်။
အဆိုပါလမ်းပိုင်းကို အကြမ်းဖက်စစ်ကောင်စီများ အသုံးပြုနေ၍ ပိတ်ပင်ခြင်းဖြစ်ပြီး ပြည်သူများ သွားလာခြင်း မပြုကြရန် အသိပေးကြောင်း ဖော်ပြထားသည်။
ဒီးမော့ဆိုမြို့နယ်ရှိ ကျေးရွာများတွင် အကြမ်းဖက်စစ်ကောင်စီတပ်နှင့် ဒေသခံတော်လှန်ရေးတပ် ပူးပေါင်း အဖွဲ့အကြား တိုက်ပွဲများ ပြင်းထန်နေသည်။
ဖေဖော်ဝါရီလလယ်မှစ၍ နေ့စဉ် တိုက်ပွဲပြင်းထန်နေသည့် ရှမ်း -ကယားနယ်စပ် မိုးဗြဲဒေသနှင့် ဒီးမော့ဆိုမြို့နယ် တိုက်ပွဲများ၌ အကြမ်းဖက်စစ်ကောင်စီတပ်က မြေပြင်၌ အင်အားအလုံးအရင်းဖြင့် ထိုးစစ်ဆင်ခြင်းအပြင် လေကြောင်းတိုက်ခိုက်မှုများ၊ လက်နက်ကြီးပြစ်ကူများ၊ တင့်ကားအသုံးပြု တိုက်ခိုက်ခြင်းများ ပြုလုပ်ခဲ့ပြီး ယခုအခါ အတွဲလိုက်ပစ် ရော့ကဒ်ဒုံး(MLRS) များ အသုံးပြု တိုက်ခိုက်နေသည်ဟု KNDFက ထုတ်ပြန်ထားသည်။