အကြမ်းဖက်စစ်တပ်ကို စွန့်ခွာလာသော တပ်မတော်သားများအား ဩစတြေးလျအစိုးရက ပြည်ဝင်ခွင့်ဗီဇာစတင်ထုတ်ပေးနေကြောင်း မဲလ်ဘုန်းအခြေစိုက် The Age သတင်းဌာနက ယနေ့ ဖော်ပြသည်။
ဇန်နဝါရီကတည်းက ဩစတြေးလျအစိုးရထံမှ ပြည်ဝင်ခွင့်ရရှိခဲ့သော တပ်မတော်သားဟောင်းနှစ်ဦးကို The Sydney Morning Herald နှင့် The Age သတင်းဌာနတို့က တွေ့ဆုံမေးမြန်းခွင့် ရရှိခဲ့သည်။
မြန်မာ-ထိုင်းနယ်စပ်ကိုမဖြတ်ကျော်မီ တော်လှန်ရေးအဖွဲ့တစ်ဖွဲ့နှင့်ပူးပေါင်းခဲ့သူ စစ်သားဟောင်းတစ်ဦးက ၎င်းအနေဖြင့် စစ်အာဏာသိမ်းမှုကို လက်မခံသောကြောင့် အကြမ်းဖက်စစ်တပ်ကို စွန့်ခွာခဲ့ခြင်းဖြစ်ကြောင်း ပြော သည်။
“ကျွန်တော်က အရပ်သားပြည်သူတွေကို မသတ်ချင်ဘူး။ ပြည်သူတွေနဲ့ ဆန့်ကျင်တဲ့ဘက်မှာလည်း မရပ် တည်ချင်ဘူး”ဟု ဗိုလ်ကြီးဟောင်းတစ်ဦးက ပြောသည်။
မိသားစုနှင့်အတူ ဩစတြေးလျ၌ အခြေချနေပြီဖြစ်သည့် အခြားသောစစ်သားဟောင်းတစ်ဦးက လည်း ထိုင်းနိုင်ငံသို့ ဖြတ်ကျော်ပြီးချိန်အထိ ၎င်းအပေါ်ခြိမ်း ခြောက်မှုများရှိခဲ့ကြောင်း ပြောသည်။
“စစ်ကောင်စီက အရမ်းရက်စက်ယုတ်မာတယ်။ ကျွန်တော် အဲဒီမှာနေလို့မရဘူး။ အာဏာမသိမ်းခင်က ကျွန်တော်တို့တိုင်းပြည် ငြိမ်းငြိမ်းချမ်းချမ်းဖြစ်မယ်လို့ ယုံကြည်ခဲ့တယ်။ ဒါပေမဲ့ ကံဆိုးစွာနဲ့ စစ်အာဏာသိမ်းမှုဖြစ်ခဲ့တယ်”ဟု အထက်ပါ စစ်သားဟောင်းက ပြော သည်။
ပြည်သူ့ရင်ခွင်ခိုလှုံ့လာသောတပ်မတော်သားနှင့် ရဲတပ်ဖွဲ့ဝင် အင်အား တစ်သောင်းခွဲကျော်ရှိလာပြီဖြစ်ပြီး CDM-တပ်မတော်သား အများစုမှာတော်လှန်ရေးအဖွဲ့များနှင့်ပူးပေါင်း၍ အကြမ်းဖက်စစ်ကောင်စီတပ်ကို ပြန်လည်တိုက်ခိုက်ကြပြီး အချို့မှာ လွတ်မြောက်နယ်မြေတွင်နေထိုင်ရင်း တော်လှန်ရေးအတွက်ဆက်လက်ကူညီပေးနေကာ၊အချို့မှာတတိယနိုင်ငံများသို့သွားရောက်ကြခြင်းဖြစ်ကြောင်း ပြည်သူ့ရင်ခွင်မှ CDM ဗိုလ်ကြီးလင်းထက်အောင်က လူထုနွေဦးနှင့် အင်တာဗျူးတွင်ဖြေကြားထားသည်။တတိယနိုင်ငံသို့သွားရောက်ခေတ္တခိုလှုံသောCDMတပ်မတော်သားအများစုမှာလည်း ရောက်သည့်နိုင်ငံမှနေ၍ နွေဦးတော်လှန်ရေးအတွက်ဆက်လက်ကူညီပေးနေကြခြင်းဖြစ်သည်။
ယခုတစ်ပတ်တွင် ကုလသမဂ္ဂက ထုတ်ပြန်သော အစီရင်ခံစာအရ မြန်မာစစ်တပ်သည် စစ်ရာဇဝတ်မှုများနှင့် လူသားမျိုးနွယ်စုကိုဆန့်ကျင်သော ရာဇဝတ်မှုများ ကျူးလွန်သည်ဟု ဖော်ပြထားပြီးအရပ်သားပြည်သူများကို ပစ်မှတ်ထားသည့် လေကြောင်းတိုက်ခိုက်ခြင်းများ၊ အရှင်လတ်လတ်မီးရှို့ခြင်း၊ ညှင်းပန်းနှိပ်စက်ခြင်းများအပါအဝင် ရက်စက်ယုတ်မှုများကို မှတ်တမ်းတင်ထားသည်။