ပုလဲနယ်တွင် ပျူ​စောထီးစခန်းမှအပြင်ထွက်လာ​သော စစ်​ကောင်စီတပ်ကို တိုက်ခိုက်ရာ ခုနစ်ဦး​သေဟု ဗိုလ်နဂါး​ပြော

စစ်ကိုင်းတိုင်း ပုလဲမြို့နယ် အင်မထီးကျေးရွာ ပျူစောထီးစခန်းမှ ​ကျေးရွာအပြင်သို့ထွက်လာသော အကြမ်းဖက်စစ်ကောင်စီတပ်သားများနှင့် ထိတွေ့တိုက်ပွဲ ဖြစ်ရာ ခုနှစ်ဦးသေဆုံးကြောင်း မြန်မာ့တော်ဝင်နဂါးတပ်တော်(MRDA)က ထုတ်ပြန်သည်။

ယနေ့(မတ်လ ၃၀) နံနက် ၉နာရီခွဲခန့်က အင်မထီးရွာနှင့် ကိုင်းတွင်း​ကျေးရွာအကြား၌ အင်အား ၅၀ခန့်ပါ အကြမ်းဖက်စစ်ကောင်စီတပ်သားများနှင့် ပျူစောထီး ၅၀ခန့်ကို စောင့်ကြိုတိုက်ခိုက်ခဲ့ခြင်းဟု (MRDA) ဦးဆောင်သူ ဗိုလ်နဂါးက ​ပြောသည်။

“ဒီကောင်တွေ အင်မထီးရွာထဲကို ပြန်ပါဝင်ပြေး ရတာ။သေတာတော့ ပျူတစ်ချို့လည်းပါတယ်။ နောက်ပြီး ငါးယောက်လောက်လည်း ဒဏ်ရာပြင်းတယ်လို့ သိရတယ်”ဟု ၎င်းက လူထုနွေဦးသို့ ပြောသည်။

တိုက်ပွဲအတွင်း ရဲဘော်များ အထိအခိုက်မရှိခဲ့ကြောင်း (MRDA)က အသိပေးသည်။

Public Service Announcement

ပုလဲမြို့နယ်၏ ပျူစောထီးရွာဟု သတ်မှတ်ထားသည့် အင်မထီးကျေးရွာတွင် အကြမ်းဖက်စစ်တပ်က တပ်စွဲထားကာကျေးရွာ ဘေးပတ်ပတ်လည် လယ်ကွင်းများအတွင်း၌ နင်းမိုင်း၊ တိုက်မိုင်းများဖြင့် မိုင်းထောင်ထားကြောင်းလည်း ဒေသခံပြည်သူ့ကာကွယ်ရေးတပ်များက ဆိုသည်။

ထို့ကြောင့် မတ်လ ၂၆ ရက်တွင် ​ဒေသခံပြည်သူ သုံးဦး မိုင်းထိခဲ့သဖြင့် အထူးသတိထား၍သွားလာခြင်းပြုရန်လည်း တိုက်တွန်းထားသည်။