ကရင်နီ(ကယား)ပြည်နယ် ဒီးမော့ဆိုမြို့နယ်တွင်အကြမ်းဖက်စစ်ကောင်စီတပ်က ကျေးရွာတစ်ခုအတွင်း လက်နက်ကြီးဖြင့် ပစ်ခတ်ခဲ့၍ အရပ်သားတစ်ဦး ဒဏ်ရာရခဲ့ကြောင်း ကရင်နီအမျိုးသားများကာကွယ် ရေးတပ်(KNDF)က သတင်းထုတ်ပြန်သည်။
ယနေ့ (ဧပြီ ၁ရက်)နံနက် ၁နာရီခန့်တွင် ဒီးမော့ဆိုမြို့နယ် ကွိုင်ငံရွာအတွင်း စစ်ကောင်စီတပ်က လက်နက်ကြီးဖြင့် ပစ်ခတ်၍ ကျေးရွာ ဘုရားရှိခိုးကျောင်းအနီး လက်နက် ကြီး ကျရောက်ပေါက်ကွဲခဲ့ရာ အသက်(၄၀)ကျော် အမျိုးသားတစ်ဦး ဒဏ်ရာပြင်းထန်စွာ ရရှိခဲ့သည်ဟုဆိုသည်။
အကြမ်းဖက်စစ်ကောင်စီတပ်သည် တိုက်ပွဲဖြစ်ပွားခြင်းမရှိတော့ နေရာများနှင့် လူနေကျေးရွာများသို့ လက်နက် ကြီးများဖြင့် ရည်ရွယ်ချက်ရှိရှိ ပစ်မှတ်ထား တိုက်ခိုက်လျက်ရှိကြောင်း ဖော်ပြထားသည်။
စစ်ကောင်စီတပ်သည် မတ်လ ၂၈ရက်ကလည်း ဒီးမော့ဆိုမြို့နယ် ဒေါ်တော်ကူးကျေးရွာသို့ လက်နက်ကြီးဖြင့် ပစ်ခတ်၍သက်ကြီးပိုင်း အရပ်သားနှစ်ဦး ဒဏ်ရာရခဲ့သည်ဟု ဆိုသည်။
Public Service Announcement
