ကရင်နီ(ကယား)ပြည်နယ်၊ ဒီးမော့ဆိုမြို့နယ် ထွီလွီးဘီလာကျေးရွာသို့ စစ်ကြောင်းထိုးလာ သော အကြမ်းဖက်စစ်ကောင်စီတပ်နှင့် တိုက်ပွဲဖြစ်ရာ စစ်ကောင်စီတပ်သား သုံးဦးသေဆုံးပြီး ရဲဘော်တစ်ဦးကျဆုံးခဲ့ကြောင်း ကရင်နီအမျိုးသားများကာကွယ်ရေးတပ်(KNDF)B-19 က ထုတ်ပြန်သည်။
“ကျသွားတဲ့ရဲဘော်မိုက်ကယ်က KNDF တပ်ရင်း(၁)က ပါ။လောလောဆယ် တော့ ဒီလောက်ပဲ သိထားသေးတယ်”ဟု KNDF တာဝန်ရှိသူတစ်ဦးက People’s Spring သို့ ပြောသည်။
ကျဆုံးခဲ့သော အာဇာနည်ရဲဘော်အား တော်လှန်ရေး ရဲဘော်တိုင်းမှ အလေးနီပြုကြောင်း KNDF B-19 က ဆိုသည်။
အကြမ်းဖက်စစ်ကောင်စီတပ်သည် ကရင်နီပြည်နယ်အတွင်း အင်အားအများ အပြား တိုးချထား ပြီး KNDF အပါအဝင် ဒေသခံပြည်သူ့ကာကွယ်ရေးတပ်များ နှင့် တိုက်ပွဲများနေ့စဥ် ဖြစ်ပွားနေသည်။
“ဒီရက်ထဲ ကရင်ပြည်နယ်ဘက်မှာ တိုက်ပွဲဖြစ်နေတော့ ကျွန်တော်တို့ဘက်ကို လှူတာနည်း သွားတယ်။ ကရင်နီမှာလည်း တိုက်ပွဲက နေ့တိုင်းဖြစ်နေတာ။ သေနတ်ကျည်လိုအပ်ချက်ရှိပါ တယ်။ လှုုပေးကြပါ”ဟု KNDF ရဲဘော်တစ်ဦးက ပြောသည်။
ထွီလွီးဘီလာ- ငွေတောင်ကျေးရွာသစ်လမ်းမပေါ်မှတစ်ဆင့် အကြမ်းဖက် စစ်ကောင်စီတပ်မှ အိမ်စီးကားများအသုံးပြု၍ ၎င်းတို့ တပ်သားများကို ပို့ဆောင်ဖြတ်သန်းသွားလာသည့်အပြင် ထွီလွီးဘီလာကျေးရွာအတွင်း ဝင်ရောက် မီးရှို့ခြင်းများပြု လုပ်နေသဖြင့် KNDF တပ်ရင်းများ နှင့် ယနေ့ နေ့လယ်ပိုင်းမှစ၍ တိုက်ပွဲများပြင်းထန်ခဲ့ခြင်း ဖြစ်သည်။
ဒီးမော့ဆိုမြို့နယ်မှတစ်ဆင့် ဖရူဆိုမြို့နယ်သို့ စစ်အင်အား ဖြည့်တင်းထောက်ပံ့ ရန် အကြမ်းဖက် စစ်ကောင်စီက ကြိုးစားနေခြင်းဖြစ်သည့်အတွက် ထွီလွီးဘီလာ- ငွေတောင်ရွာသစ် လမ်းပိုင်းကို ပြည်သူများအနေဖြင့် လတ်တလော အသုံးမပြုရန် KNDF က မေတ္တာရပ်ခံသည်။