ရခိုင်ပြည်နယ် မြေပုံမြို့နယ်တွင် ရက္ခိုင့်တပ်တော် (AA) နှင့် စစ်ကောင်စီတပ်တို့ ယနေ့တိုက်ပွဲဖြစ်ပွားခဲ့ကြောင်း မြို့ခံတစ်ဦးက ပြောသည်။
“ဒီနေ့နေ့လည် ၁၂နာရီကျော်ကျော်လောက်က မြေပုံနဲ့ ၅မိုင်လောက်ဝေးတဲ့ ရွာပေါ့ ဝက်ခေါင်းဆိုတာရှိတယ်။ ဝက်ခေါင်းရွာက မြေပုံနဲ့ မင်းပြားကားလမ်းပေါ်မှာရှိတာ။ ဝက်ခေါင်းရွာရဲ့တောင်ဘက်အစပ်မှာ ကိုယ်ထူကိုယ်ထ ဆေးခန်းလုပ်ထားတာရှိတယ်။ အဲဒီမှာ မြန်မာ့တပ်မတော် (စစ်ကောင်စီ)က အင်အား ၃၀လောက်တပ်စွဲထားတာပေါ့။ AA ဘက်က သွားတဲ့အခါမှာ ၅မိနစ်လောက်ဖြစ်တာ”ဟု ၎င်းက ဆိုသည်။
အဆိုပါ ထိတွေ့တိုက်ပွဲတွင် လက်နက်ကြီး၊ လက်နက် ငယ် ပစ်ခတ်မှုအချို့ရှိခဲ့ပြီး နှစ်ဖက်ထိခိုက်သေဆုံးမှု အခြေအနေကို မသိရဟု ပြောသည်။
“နှစ်ဖက်ကတိကဝတ် စာချုပ်စာတမ်း သဘောတူညီချက် ဘာမှမရှိဘူး။ သူ့နယ်မြေ ကိုယ့်နယ်မြေ လည်း အတိအကျပိုင်းခြားသတ်မှတ်ထားတာမရှိတော့ ဟိုဘက်စစ်ကြောင်း ဒီဘက်စစ်ကြောင်း ထိတွေ့မှုကတော့ အချိန်မရွေးဖြစ်သွားနိုင်တဲ့သဘောရှိတယ်”ဟု မြေပုံဒေသခံက ပြောသည်။
Public Service Announcement
AAနှင့် စစ်ကောင်စီတပ်တို့သည် ၂၀၂၀ ရွေးကောက်ပွဲမတိုင်မီက တိုက်ပွဲများပြင်းထန်စွာ ဖြစ်ပွားခဲ့သော်လည်း ရွေးကောက်ပွဲကာလနှင့် စစ်တပ်အာဏာသိမ်းပြီးနောက်ပိုင်း တိုက်ပွဲဖြစ်ပွားမှု မဖြစ်သလောက်ရှိခဲ့သည်။ ယခုနှစ်အတွင်း မောင်တောဒေသ၌ တိုက်ပွဲအချို့ ဖြစ်ခဲ့ပြီး စစ်ကောင်စီတပ်မှ သေဆုံးထိခိုက်များခဲ့သော်လည်း ရက်ပိုင်းသာဖြစ်ပြီး ပြန်လည်တည်ငြိမ်သွားခဲ့သည်။
