'/%3E%3C/svg%3E){kind=small}
◾️အသက် ၃ နှစ်အရွယ် ကလေးငယ်ရဲ့သတင်းကို စစ်ကောင်စီ သတင်းအမှောင်ချ
အလုံမြို့နယ် မူကြိုကျောင်းကနေ ဖမ်းဆီးခေါ်ဆောင်သွားတဲ့ အသက် ၃ နှစ်အရွယ်ကလေးငယ်ရဲ့ မိခင် မဝေခေါ် မသီရိဝေ အပါအဝင် ၁၆ ဦးကို ဖမ်းဆီးထားတယ်လို့ စစ်ကောင်စီက ထုတ်ပြန်လာပါတယ်။
မဝေအပါအဝင် ဖမ်းမိထားသူတွေဟာ သင်္ကြန်ကာလအတွင်းဖောက်ခွဲရေးလုပ်မယ့်သူတွေလို့ စစ်ကောင်စီက စွပ်စွဲထားပါတယ်။
မဝေကိုတော့ ဧပြီလ ၅ ရက်မနက်ပိုင်းက အင်းစိန်မြို့နယ် BOC မှတ်တိုင်အနီးဖမ်းမိတာလို့ဆိုထားပါတယ်။
Public Service Announcement
ဖမ်းမိထားသူတွေထဲမှာ အမျိုးသား ၁၄ ဦးနဲ့အမျိုးသမီး ၂ ဦးပါဝင်ပြီး လက်နက် ၊ဖောက်ခွဲရေးပစ္စည်းတွေနဲ့ ဖမ်းမိတာလို့လည်း စစ်ကောင်စီက သတင်းဖြန့်ထားပါတယ်။
သင်္ကြန်ကာလမရောက်ခင် ဧပြီလ ၅ ရက် မှာ မဝေဖမ်းခံရပြီးနောက် နာရီပိုင်းအတွင်း ၃ နှစ်အရွယ်သားဖြစ်သူကို အလုံမြို့နယ်မှာရှိတဲ့ မူကြိုကျောင်းကနေ စစ်ကောင်စီတပ်ဖွဲ့ဝင်တွေက သွားရောက်ဖမ်းဆီးခေါ်ဆောင်သွားတာပါ။
ဒီသတင်းကို စစ်ကောင်စီဘက်က အမှောင်ချထားပေမယ့် သတင်းမီဒီယာတွေနဲ့ လူမှုကွန်ရက်မှာတော့ ပျံနှံ့နေပါတယ်။
ဧပြီလ ၅ ရက်နေ့ဟာ မဝေရဲ့သားဖြစ်သူမွေးနေ့ဖြစ်တာကြောင့် အဲဒီနေ့ မနက်ပိုင်း မူကြိုကျောင်းမှာ ကြက်ဆီထမင်းလှူခဲ့သေးတယ်လို့သိရပါတယ်။
မြန်မာနောင်းမ် မီဒီယာရဲ့ဖော်ပြချက်အရတော့ အဲဒီနေ့မှာ မဝေကိုဖမ်းဆီးပြီး အလုံမြို့နယ်၊ ဆင်မင်းရပ်ကွက် Best Choice မူကြိုကျောင်းဆရာမတွေ ၊ သူငယ်ချင်းတွေနဲ့အတူ ရှိနေတဲ့ မွေးနေ့ရှင် မောင်သန့်ဘုန်းဝေယံကို သွားရောက် ဖမ်းဆီးခဲ့တယ်လို့ သိရပါတယ်။
လက်ရှိအချိန်မှာတော့ မောင်သန့်ဘုန်းဝေယံနဲ့အတူနေကြတဲ့ မဝေရဲ့ မိဘတွေနဲ့ မောင်ဖြစ်သူဟာလည်းနေအိမ်ကနေ ထွက်ပြေးတိမ်းရှောင်နေရတယ်လို့ BBC မြန်မာပိုင်းကလည်းဖော်ပြထားပါတယ်။
စစ်ကောင်စီရဲ့သတင်းထုတ်ပြန်ချက်မှာ မဝေတို့ကို ဖမ်းဆီးတဲ့ အကြောင်းသာဖော်ပြထားပြီး ၃ နှစ်အရွယ် ကလေးငယ်ရဲ့သတင်းကို တစ်စုံတစ်ရာဖော်ပြထားတာမျိုးမတွေ့ရပါဘူး။
