စာရေးဆရာတွေကိုဖမ်းဆီးထောင်ချရာမှာ မြန်မာဟာ ကမ္ဘာ့အဆိုးရွားဆုံး တတိယအဆင့်ကိုရောက်လာ

စစ်တပ်အာဏာသိမ်းပြီးတဲ့နောက် မြန်မာနိုင်ငံမှာ စာရေးဆရာတွေ ၊တတ်သိပညာရှင်တွေ ဖမ်းဆီးခံရတဲ့နှုန်းဟာ ဆိုးရွားလာနေပြီး ကမ္ဘာ့အဆင့်မှာ တတိယနေရာရောက်လာတယ်လို့အမေရိကန်အခြေစိုက် PEN America က ထုတ်ပြန်ပါတယ်။

၂၀၂၁ ခုနှစ်အတွက် ကမ္ဘာတလွှား လွတ်လပ်စွာရေးသားခွင့် ညွှန်းကိန်း ကို PEN America က ထုတ်ပြန်ရာမှာ စစ်တပ်အာဏာသိမ်းထားတဲ့ မြန်မာနိုင်ငံဟာ တရုတ် ၊ ဆော်ဒီအာရေဗီးယား နိုင်ငံတွေရဲ့နောက်မှာ ရပ်တည်နေပါတယ်။

အဲဒီညွှန်းကိန်းမှာဆိုရင် တရုတ်မှာ ၈၅ ဦး ၊ ဆော်ဒီမှာ ၂၉ ဦး ၊ မြန်မာမှာ ၂၆ ဦး အသီးသီး ဖမ်းဆီးခံထားရပါတယ်။

ဒီ ၃ နိုင်ငံမှာ ဖမ်းဆီးခံရထားသူဦးရေဟာ ကမ္ဘာတလွှား ဖမ်းဆီးခံထားရတဲ့ စာရေးဆရာနဲ့တတ်သိပညာရှင်စုစုပေါင်းဦးရေနဲ့ ထက်ဝက် ရှိတယ်လို့လည်း PEN America က ပြောထားပါတယ်။

Public Service Announcement

မြန်မာနိုင်ငံရဲ့ လွတ်လပ်စွာရေးသားပြောဆိုခွင့် အခြေအနေဟာ အာဏာသိမ်းစစ်တပ်က ဖိနှိပ်မှုတွေလုပ်တာ ၊စာရေးဆရာတွေ ၊တတ်သိပညာရှင်တွေကိုစောင့်ကြည့်တာ ၊ လွတ်လပ်စွာရေးသားပြောဆိုခွင့် ကန့်သတ်ခံရတာ ၊ဖမ်းဆီးထောင်ချတာတွေရှိနေတယ်လို့ အစီရင်ခံစာက ဖော်ပြထားပါတယ်။