မုံရွာမြို့ သင်္ကြန်အကြတ်နေ့တွင် ပြည်သူများအားစစ်ဆေးနေသော စစ်ကောင်စီတပ် ဗုံးခွဲတိုက်ခိုက်ခံရ

စစ်ကိုင်းတိုင်း၊ မုံရွာမြို့တွင် ယနေ့ သင်္ကြန်အကြတ်နေ့တွင် ပြည်သူများအား စစ်ဆေးနေသော အကြမ်းဖက်စစ်ကောင်စီတပ် ဗုံးခွဲတိုက်ခိုက်ခံရပြီး သေဆုံးထိခိုက်မှုရှိကြောင်း မုံရွာခရိုင် ပြည်သူ့ကာကွယ်ရေးတပ်ဖွဲ့တပ်ရင်းက သတင်းထုတ်ပြန်သည်။

ယနေ့ (ဧပြီ ၁၅ ရက်) သင်္ကြန်အကြတ်နေ့တွင် မုံရွာမြို့ တမာတန်းမီးပွိုင့်၌ စစ်ဆေးနေသော စစ်ကောင်စီတပ်များအား မုံရွာခရိုင်ပြည်သူ့ ကာကွယ်ရေးတပ်ဖွဲ့တပ်ရင်း(၂ ) တပ်ခွဲ – ၁၊ Monywa Ranger Group/Truth Army၏ တပ်စိတ် (၁)၊ Monywa Red Peacockမှ မိုင်းဆွဲတိုက်ခိုက်ရာ စစ်ကောင်စီတပ်သား လေးဦး သေဆုံးကြောင်း မုံရွာခရိုင်ပြည်သူ့ ကာကွယ်ရေးတပ်ဖွဲ့တပ်ရင်းက ထုတ်ပြန်သည်။

မြို့ပြည်သူများအနေဖြင့် အသွားအလာဆင်ခြင်ပေးရန်၊ Mission လုပ်နေချိန် ရပ်ကြည့်ခြင်း၊ ထွက်ကြည့်ခြင်းများ မလုပ်ကြရန်၊ Mission လုပ်နေချိန် ထိခိုက်မှုတစ်စုံတစ်ရာဖြစ်ခဲ့ပါက အပြစ်မမြင်ကြစေရန် မုံရွာခရိုင်ပြည်သူ့ ကာကွယ်ရေးတပ်ဖွဲ့တပ်ရင်း (၂) တပ်ခွဲ – ၁ Monywa Ranger Group/Truth Army၏ တပ်စိတ် (၁) တို့က သတိပေးသည်။

အဆိုပါ ထုတ်ပြန်ချက်နှင့်ပတ်သက်၍ မုံရွာခရိုင်ပြည်သူ့ကာကွယ်ရေးတပ်ဖွဲ့ တပ်ရင်းသို့ ဆက်သွယ်မေးမြန်းထားပြီး ပြန်လည်ဖြေကြားခြင်းမရှိသေးပါ။

Public Service Announcement

ထို့အပြင် သင်္ကြန်အကြတ်နေ့တွင် မုံရွာမြို့အနှံ့ ဗုံးပေါက်ကွဲမှုများရှိနေပြီး စစ်ကောင်စီမှ ဆိုင်ကယ် နှစ်ယောက်စီးနင်းမှုများကို ပစ်ခတ်ဖမ်းဆီးမှုများ ပြုလုပ်ခဲ့ကြောင်း မုံရွာလမ်းပိုင်း အခြေအနေများသတင်းပေးနေသည့် MRIက အသိပေးထားသည်။

သင်္ကြန်အကြို​နေ့တွင် အာဏာစစ်​ကောင်စီ၏ မဏ္ဍာပ်ဖွင့်ပွဲ၊ စစ်​ကောင်စီ၏ သင်္ကြန်ကို မုံရွာပြည်သူအများစုက ဝင်​ရောက်ပူး​ပေါင်းခြင်းမရှိ​ပေ။