စစ်ကိုင်းတိုင်း၊ မြောင်မြို့နယ်ရဲစခန်းတွင် သင်္ကြန်အကြတ်နေ့ညနေပိုင်းက ဒုစခန်းမှူး၏ မွေးနေ့ပွဲကျင်းပနေစဥ် အီနာဂါ(ရိုင်ဖယ်ပစ်ဗုံး)ဖြင့် ပစ်ခတ်တိုက်ခိုက်ခဲ့ကြောင်း မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM)က ထုတ်ပြန်သည်။
ဧပြီ ၁၅ သင်္ကြန်အကြတ်နေ့ ညနေပိုင်းက မြောင်မြို့နယ်ရဲစခန်းမှ ဒုစခန်းမှူး စည်သူလွင်၏ မွေးနေ့အား ဆောင်းဘောက်များဖြင့် ဆူညံစွာဖွင့်ပြီး ရဲအုပ်စုမှာ မူးရူးပျော်ပါးကာ မွေးနေ့ကိတ် ခွဲမည့်အချိန်တွင် ပစ်ခတ်တိုက်ခိုက်ခဲွခြင်းဟု CDSOM က အသိပေးသည်။
အဆိုပါ တိုက်ခိုကိမှုကို မြောင်မြို့နယ် (ပကဖ)အဖွဲ့ဝင် ကိုနွေဦး(အင်အားစုဖွဲ့ရေးနှင့် လေ့ကျင်ရေးတာဝန်ခံ) ဦးဆောင်သည့် မြောင်မြို့နယ် ပြည်သူ့ကာကွယ်ရေးနှင့်လုံခြုံရေးအဖွဲ့(CDSOM)၊ စစ်ကိုင်းခရိုင် တပ်ရင်း (၁)၊(၂)၊ တပ်ခွဲ (၃)တပ်ရင်းမှူး ကိုတိုက်ဂါး-MUA ပြည်သူ့တပ်မတော်(မြောင်) ၊ PDF-TALOKE (မြင်းခြံခရိုင်တပ်ရင်း-၂) တပ်ရင်းမှူး ဆရာသကြား ၊ ဒေါင်းစစ်သည်အဖွဲ့၊ မြင်းမူမြိုပြတော်လှန်ရေးအဖွဲ – CRF (Myinmu) နှင့် M2W တပ်ရင်းမှူး မင်းယက္ခ၊ Black Eagle Defence Force -MMUတို့နှင့် ပူးပေါင်းပြီး မြို့ပြပြောက်ကျား စစ်ဆင်ရေးတစ်ရပ်ကို ညနေ ၅နာရီ ၂၀ မိနစ်အချိန်တွင် ဆင်နွှဲခဲ့ကြောင်း CDSOM က ထုတ်ပြန် သည်။
“ဖြစ်စဉ်မှာ ရဲအုပ်စုအတွင်း အီနာဂါ(ရိုင်ဖယ်ပစ်ဗုံး)ဖြင့် ပစ်ခတ်တိုက်ခိုက်ခဲ့ရာ ဆူညံစားသောက်နေသော ရဲအုပ်စုမှာ အပျော်များချက်ချင်းပျောက်ပြီး ငရဲပြည်ရောက်တော့မည်ကဲ့သို့ လဲကျသူကျ၊ ကုန်းထသူထနှင့် အော်ဟစ်ပြေးလွှား ဝရုန်းသုန်းကားဖြစ်ကုန်ကြသည်။ “ဟု CDSOM ၏ ထုတ်ပြန်ချက်တွင် ရေးသားထား သည်။
“မြောင်ရဲစခန်း ပါ။ စစ်ခွေးတပ်စွဲထားတဲ့ မြောင်မြို့ပေါ်က ရဲစခန်းပါ။ အီနာဂါနဲ့ တိုက်ခိုက်ခဲ့တာပါ။ စစ်ခွေးတွေက အသေပျောက်မပြောနိုင်သေးဘူးဗျာ။ ရဲစခန်းဝင်းထဲမှာတော့ မိချောရေ မိချော ဆိုပြီး သီချင်းဖွင့်နေချိန် ခွေးစာကျွေးတာနဲ့ကွက်တိဖြစ်တယ်။ စခန်းတွင်းလည်း မတည်မငြိမ် အုံကြွကုန်တယ်။ ဆေးရုံပို့တာမရှိဘူး။ ဆေးရုံကားတွေမထွက်ဘဲ ကြိတ်လုပ်နေတာ။ အသေ အပျောက်တော့မသိရသေးဘူးဗျ ။ ထိတာတော့ထိချက်ပြင်းတယ်”ဟု CDSOM တာဝန်ရှိသူက ပြောသည်။
ရဲအုပ်စု အသေအပျောက်နှင့် ဒဏ်ရာရစာရင်းမှာ ၎င်းတို့ဘက်မှဒဏ်ရာရသူများအား ဆေးရုံပို့ခြင်းပင်မရှိဘဲ သတင်းအမှောင်ချထားသောကြောင့် မသိရှိရသေးကြောင်း CDSOM က ပြောသည်။
စစ်ဆင်ရေးအပြီး ညီနောင်များ ပြန်အလာ လမ်းတစ်ဝက်အရောက်တွင် ရမ်းသမ်းပစ်ခတ်နေသော အသံများကြားရပြီး မြို့အထွက်နေရာများတွင် ပစ်ခတ်ရှာဖွေနေကြောင်း၊ ညီနောင်များလည်း အထိအခိုက်မရှိဘဲ ဌာနေသို့ပြန်လည်ရောက်ရှိခဲ့ကြကြောင်း၊ စစ်ဆင်ရေးမစတင်မီ မိနစ် ၂၀အလိုတွင် စစ်အုပ်စုနှင့် နီးကပ်စွာမနေကြရန် ပြည်သူများထံသို့ ကြိုတင်သတင်းပေးပြီး ဆောင်ရွက်ခဲ့ကြောင်း CDSOM က အသိပေးသည်။
ယမန်နေ့ဖြစ်စဥ်ကြောင့် ယနေ့ သင်္ကြန်အတက်နေ့တွင် ရဲအုပ်စုမှာ သင်္ကြန်မဏ္ဍပ်တွင် သောက်စားပျော်ပါးခြင်းများ မပြုလုပ်နိုင်ကြတော့သည့်အပြင် စခန်းအတွင်းမှ စခန်းအပြင်သို့ မထွက်ကြတော့ဘဲ တိတ်ဆိတ်နေကြကြောင်း ဒေသခံများထံမှ သိရသည်။