“နန်းထိုက်အောင်”စစ်ဆင်ရေး၏ စီးပွားရေးပစ်မှတ်အဖြစ် စစ်တပ်ပိုင် မြန်မာဘီယာစက်ရုံကို (၄၀)မမ ဗုံးသီးနှစ်လုံးဖြင့် ပစ်ခတ်တိုက်ခိုက်ခဲ့ကြောင်း ရန်ကုန်တိုင်းစစ်ဒေသခွဲကွပ်ကဲရေးအဖွဲ့တာဝန်ရှိသူက People’s Springသို့ ပြောသည်။
ရန်ကုန်မြို့ မင်္ဂလာဒုံမြို့နယ်၊ ပျဉ်းမပင်စက်မှုဇုံ အမှတ် (၃)လမ်းရှိ အကြမ်းဖက်စစ်ကောင်စီတပ်၊ စီးပွားရေးဦးပိုင်၏ အဓိကဝင်ငွေလမ်းကြောင်းတစ်ခုဖြစ်သည့် မြန်မာဘီယာစက်ရုံကို ယမန်နေ့(ဧပြီ ၁၉ ရက်)ညနေ ၄ နာရီခန့်က တိုက်ခိုက်ခဲ့ခြင်းဟု ဆိုသည်။
“ဒီပစ်ခတ်တိုက်ခိုက်မှုကို မြောက်ပိုင်းခရိုင်ပြည်သူ့ကာကွယ်ရေးအဖွဲ့က ဆောင်ရွက်ခဲ့တာဖြစ်ပြီး (၄၀) မမ ဗုံးသီး နှစ်လုံးအသုံးပြုခဲ့တယ်”ဟု အထက်ပါတာဝန်ရှိသူက ပြောသည်။
တိုက်ခိုက်မှု ဖြစ်စဥ်တွင် လူထိခိုက်မှုမရှိခဲ့သော်လည်း ဘီယာထုတ်လုပ်ရေး၏ ပင်မ ထုတ်လုပ်ရေး အစိတ် အပိုင်းနှစ်ခု ပျက်စီးမှုရှိခဲ့သည်ဟု ၎င်းက အသိပေးသည်။
Public Service Announcement
“မြန်မာဘီယာစက်ရုံထဲဗုံးပေါက်တာခေါင်မိုးပါပွင့်ထွက်တယ်။အသံကျယ်ကြီးပဲအားရတယ်။နောက်တော့စက်ရုံထဲကားဘီးပေါက်တာပါဆိုသတင်းလွှင့်နေတာ။သူတို့ထဲမဟုတ်ပါဘူးလန်ဒန်စက်ရုံထဲဆိုပြီးပြန်သတင်းလွှင့်တယ်” ဟုပြည်သူတစ်ဦးကပြောသည်။
ဗုံးပေါက်ကွဲပြီးနောက် စစ်ကောင်စီတပ်ကလညရောက်ပိတ်ဆို့စစ်ဆေးရှာဖွေပြီး အရပ်ဝတ်ဖြင့်သေနတ်များကိုင်ထားသည့် စစ်ကောင်စီတပ်သားများကစက်ရုံပတ်ပတ်လည်တွင်စောင့်နေကြောင်းလည်းသိ့ရသည်။
ဧပြီ ၁၆ ရက်ကလည်း မြန်မာဘီယာစက်ရုံအား ပစ်မှတ်ထားတိုက်ခိုက်မှုဖြစ်စဥ်ရှိခဲ့ပြီး မပေါက်ကွဲသေးသည့် အီနာဂါဗုံးသီးတစ်လုံးကို အကြမ်းဖက်စစ်တပ်က ရှာဖွေတွေ့ရှိခဲ့သည်။
ယခုလ ဒုတိယပတ်ကစတင်ခဲ့သော “နန်းထိုက်အောင် “စစ်ဆင်ရေးသည် အကြမ်းဖက်စစ်ကောင်စီ အပါအဝင် ၎င်း၏ ထောက်တိုင်များကို တိုက်ခိုက်မှုအရှိန်မြှင့်တင်မည့် စစ်ဆင်ရေးဖြစ်ကြောင်း တာဝန်ရှိသူများက ပြောကြားထားသည်။
လက်ရှိတွင် ထိုစစ်ဆင်ရေးကို ဒလ၊မင်္ဂလာဒုံ၊ အင်းစိန် ၊ ကမာရွတ်၊လမ်းမတော်၊ ကော့မှုး၊ တွံတေး၊ သုံးခွ၊ ရွှေပြည်သာ ၊သာကေတ နှင့် လှိုင်သာယာတို့တွင် ဆောင်ရွက်ခဲ့ပြီး စစ်ကောင်စီတပ်မှ ဗိုလ်မှူးတစ်ဦးအပါအဝင် တပ်သာများ၊အုပ်ချုပ်ရေးမှူးများနှင့် သတင်းပေးဒလန် ခုနှစ်ဦး ထက်မနည်းသေဆုံးခဲ့သည်။
