▪️စစ်ကောင်စီတပ်၏ ရှေ့တန်းစခန်းမှ တပ်သားများ CDMပြုလုပ်လာမှုများရှိနေဟုဆို
ကရင်အမျိုးသားအစည်းအရုံး(KNU) တပ်မဟာ(၅) နယ်မြေ လေးကေ့ကော်ဒေသသို့ အင်အားအလုံးအရင်းဖြင့် ထိုးစစ်ဆင်ရန် စစ်ကောင်စီတပ်က ပြင်ဆင်နေသည့် သတင်းများ ကြားနေရပြီး အခြေအနေအမျိုးမျိုးကို ရင်ဆိုင်သွားမည်ဖြစ်ကြောင်း အဆိုပါဒေသရှိ ပြည်သူ့ကာကွယ်ရေးတပ်(PDF) တပ်မှူးတစ်ဦးက ပြောကြားသည်။
လေးကေ့ကော်ဒေသ တိုက်ပွဲများ၌ သေဆုံးထိခိုက်မှုများပြားခဲ့သည့်စစ်ကောင်စီတပ်သည် အဆိုပါဒေသကို ထိုးစစ်ဆင်ရန် အင်အားစုဖွဲ့မှုများရှိသကဲ့သို့ စစ်ရေးလှုပ်ရှားမှု အချို့တွေ့ရသည်ဟု ဆိုသည်။
“သူတို့ဘက်က ပြင်ဆင်နေတဲ့ သတင်းတချို့တော့ ကြားတယ်။ အခြေအနေ အမျိုးမျိုးကို ရင်ဆိုင်ဖို့အတွက်ကတော့ ကျွန်တော်တို့က ပြင်ဆင်ထားပြီးသားပါပဲ။ ညကဆို ၁၂နာရီခွဲလောက်မှာ ဗုံးလာကြဲတာ”ဟု PDF တပ်မှူးက ပြောသည်။
Public Service Announcement
ဆက်လက်၍ အဆိုပါ တပ်မှူးက “ သူတို့ဘက်က လှုပ်ရှားစစ်ကြောင်းတွေတော့ တခါတစ်ရံ လှုပ်ရှားတာတွေ့တယ်။ ဒါပေမဲ့ ကျွန်တော်တို့နဲ့ထိတွေ့မှုအထိ ဖြစ်မသွားဘူး။ အဲဒီဘက်က ထောင်ထားတဲ့မိုင်းတွေထိပြီး အထိနာပြီးပြန်ဆုတ်သွားတာပဲရှိတယ်”ဟု ပြောကြား သည်။
လတ်တလောတွင် စစ်ကောင်စီလက်အောက်မှ ရုန်းထွက်ကာ ပြည်သူနှင့်ပူးပေါင်းရန် CDM ပြုလုပ်လာသည့် တပ်သားများ ပိုများလာကြောင်း ၎င်းက ဆိုသည်။
“ဘာပဲဖြစ်ဖြစ် CDMတွေကလည်း ကျွန်တော်တို့သတင်းမှာ ဖော်ပြတာရှိသလို မဖော်ပြတာတွေလည်းရှိတယ်။ ရှေ့တန်းကနေ CDM လုပ်တဲ့ လူတွေ တဖွဲဖွဲဝင်နေတာရှိတယ်။ သတင်းပေါ်မရောက်သေးတာပဲရှိတယ်။ အရေအတွက်တော့ ကျွန်တော်တို့ မပြောချင်သေးဘူး” ဟု လေးကေ့ကော်ဒေသရှိ PDFတပ်မှူးက ပြောသည်။
စစ်ကောင်စီဘက်က လေကြောင်းနှင့် လက်နက်ကြီးပစ်ကူအပါအဝင် စစ်အင်အားအလုံးအရင်းဖြင့် လေးကေ့ကော်ဒေသကို ချေမှုန်းရန်ကြိုးစားလာနိုင်ရာ ပူးပေါင်းတပ်ဖွဲ့များဘက်ကလည်း တုံ့ပြန်သွားမည်ဖြစ်ကြောင်း၊ ပြည်သူများအနေဖြင့် စစ်ကောင်စီတပ်၏ စစ်ရေးလှုပ်ရှားမှုသတင်းများကို မျှဝေပေးရန် တိုက်တွန်းလိုကြောင်း ၎င်းက ဆိုသည်။
လေးကေ့ကော်ဒေသအပါအဝင် KNU တပ်မဟာ(၆) နယ်မြေအတွင်း၌ ယခု ဧပြီလဝက်အတွင်း တိုက်ပွဲ ၅၅ကြိမ် ဖြစ်ပွားခဲ့ရာ စစ်ကောင်စီတပ်နှင့် ၎င်း၏ လက်အောက်ခံ နယ်ခြားစောင့်တပ်(BGF)တို့မှ တပ်ဖွဲ့ဝင် ၈၇ဦး သေဆုံးကာ ၄၅ဦးထိခိုက်ဒဏ်ရာရရှိခဲ့ကြောင်း KNU ဗဟို သတင်းနှင့် ပြန်ကြားရေးဌာနက ထုတ်ပြန်ထားသည်။
