လှူဒါန်းပေးရန် မေတ္တာရပ်ခံ
ယောဒေသတွင် စစ်ကောင်စီ၏ စစ်ကြောင်းထိုးတိုက်ခိုက်မှုများကြောင့် အရပ်သားပြည်သူ တစ်သောင်းကျော် အိုးမဲ့အိမ်မဲ့ဖြစ်နေရပြီး စားနပ်ရိက္ခာနှင့် ဆေးဝါးများလိုအပ်နေသည်ဟု ယောဒေသလုံးဆိုင်ရာ စစ်ဘေးရှောင်များ ကူညီစောင့်ရှောက်ရေးကော်မတီ (YRCIDP)က ထုတ်ပြန်သည်။
ထီးလင်း၊ ကျောက်ထု၊ဂန့်ဂေါ၊ ဆောမြို့နယ်တို့ပါဝင်သော ယောနယ်တွင် အိမ်ခြေပေါင်း ၅၀၀ ကျော်ကို စစ်ကောင်စီက မီးရှို့ဖျက်စီးခဲ့ပြီး ပြည်သူများသည် အိုးမဲ့အိမ်မဲ့ဘဝဖြင့် တောတောင်ထဲတွင် ခက်ခဲဆင်းရဲစွာ ရုန်းကန်နေရကြောင်း YRCIDPက ယနေ့(ဧပြီ ၂၂ရက်) အသိပေး ရှင်းပြထားသည်။
“ယောနယ်ရှိ စစ်ဘေးရှောင်များအတွက် ဆေးဝါး၊အစားအစာနဲ့ သန့်ရှင်းတဲ့ရေ ရရှိဖို့ မလွယ်ကူတဲ့ကြားကနေ ရုန်းကန်နေရပါတယ်။ အိုးမဲ့အိမ်မဲ့ စစ်ဘေးရှောင် ပြည်သူတွေဟာ အစားအစာ၊ သောက်ရေနဲ့ ဆေးဝါးများကို အဓိကလိုအပ် လျက်ရှိပါတယ်”ဟု YRCIDP ထုတ်ပြန်သည်။
Public Service Announcement
ယောဒေသတွင် စစ်ကောင်စီက စစ်ကြောင်းထိုးလှုပ်ရှားနေပြီး ပြည်သူ့ကာကွယ် ရေးအဖွဲ့များနှင့် တိုက်ပွဲများ နေ့စဥ်ဖြစ်နေသည်။
“တော်လှန်ရေးမှာ စစ်တပ် လန်(ရှုံး)သွားပြီ။ ကျွန်တော်တို့ ပြည်သူတွေဖက်က နိုင်နေပြီ။ အပြီးသတ် အနိုင်မရခင်၊ ပွဲမသိမ်းနိုင်ခင်လေးမှာ အနယ်နယ်အရပ် ရပ်က ပြည်သူတွေရဲ့အားနဲ့ စစ်ဘေးရှောင်တွေကို ကူညီပေးကြပါ”ဟု ထီးလင်းမြို့နယ်မှ ပြည်သူ့ကာကွယ်ရေး ရဲဘော်တစ်ဦးက ပြောသည်။
စစ်ဘေးရှောင်များကို ထောက်ပံ့လှုုဒါန်းလိုပါက ယောဒေသလုံးဆိုင်ရာ စစ်ဘေးရှောင်များ ကူညီစောင့်ရှောက်ရေး ကော်မတီ (YRCIDP) page https://www.facebook.com/YRCIDP/
၏ မက်ဆင်ဂျာသို့ ဆက်သွယ်ပေးရန် အသိပေးထားသည်။
